أعرف حقك … حق الشفعة…سامي القلال

سمير ومنيرة ورثو دار من بوهم سي محمد الله يرحمو، إحتاج سمير للفلوس وضاق بيه الحال ما لقى قدامو إلا أنو يبيع ورثو من دار ويخلص ديونو، نهار وهو في القهوة دخل خليل عشيرو وصاحبو وحكالو الحكاية، خليل ما فكر حتى لحظة وقلو نشري من عندك بالسوم إلي تطلبو وربي يسهلك صاحبي في ضيقك.

نهار وأنا في الحومة نادتني منيرة وسألتني: وليدي كان تسمح إنت ولد الدار ونحب نستشيرك في حاجة.

قلتلها: على ما نقدر بالطبيعة تفضل.

قالتلي: وليدي سمير باع بايو في الدار وأنا ما عندي وين نكن راسي بخلافها وماشي يدخل عليا عبد براني قلي شنعمل يا وليدي دلني…

قلتلها: لباس إن شاء الله الحل موجود، وهو أنك تمارس حقك في الشفعة.

قالتلي: وشنية وليدي هذي الشفعة؟؟

قلتلها: هي حلولك إنت بإعتبارك شريكة بالإرث في الدار محلّ المشتري خليل في التملك بمبيع سمير بإعتبارو شريكك أما لازم إحترام للشروط إلي نص عليها القانون وهكة تولي إنت تملك الدار الكلها وحدك.

قالتلي:  وشنية هذه الشروط يا وليدي؟

قلتلها: أول حاجة، وخلاف أنو لازمك تكون شريكة في العقار، هي أنكم تكونو شركاء في العقار على الشياع وحاجة أخرى لازمك تعرض كل الثمن إلي باع بيه سمير على الخليل مع جميع المصاريف منها تحرير العقد والتعريف بالإمضاء وتسجيلو وغيرها….

قالتلي: وهالفلوس وقتاه نقدمها للخليل ؟ ثمة آجال ؟؟

قلتلها: إيه بالطبيعة لازم في ظرف شهر من إعلامك بالشراء من طرف خليل، وفي صورة ما إذا ما علمكش فإن حق القيام يسقط بمضي ستة أشهر من يوم ترسيم العقد بالسجل العقاري بالنسبة للعقارات المسجلة ومن يوم تسجيل العقد بالقباضة المالية بالنسبة للعقارات غير المسجلة.

قالتلي: وإذا ما قبلش الفلوس خليل شعملنا؟

قلتلها: الحل ديمة موجود، وهو أنو يقع تأمين هاكة المبلغ كاملا بصندوق الأمائن والودائع من غير ما نحتاجو للقاضي باش يأذن بالتأمين كيما الحالات العادية، والأفضل يقع تأمين المبلغ بواسطة شيك لتفادي الضرائب في صورة تأمين المبلغ نقدا، ومن بعد نبداو في إجراءات دعوى الشفعة قدام المحكمة، وفي صورة قبولها يسترجع خليل فلوسوا على آخر مليم وإنت تاخذ الدار وتولي ليك وحدك وهكك ما يقلقك حد.

قالتلي: الحمد لله يا وليدي وقيت مالا باش نبداو في الإجراءات هذي آجالها قصيرة.

قلتلها: لازم من توة تبدأ أما أول حاجة لازمك تمشي للمحامي بإعتبار إنابتو وجوبية.

قالتلي: الله ينورك يا وليدي وربي يسهل فيما هو صعيب.

قلتلها: تفضل إنت كيما أمي وفي كل وقت أنا موجود لأي إستفسار آخر إذا تعطلت في حاجة وإلا جاتك موش واضحة وتوة المحامي يزيد يفسرلك زادة وتوة شاهية طيبة يا ميمتي وقيت باش نقضي قضياتي.

قالتلي: وإنت بالأمثل يا وليدي.                         أعرف حقك… والحق يعلو ولا يعلى عليه