أكبر مشكل هو أننا ما عادش نحبو بعضنا…الفة يوسف

كيف لقيتكم تحكيو على فيديو فاطمة بوعون قلت نشوفه، منيش باش نتكلم على المحتوى، فيه مجهود وربي يعين الجميع…
باش نتكلم على المحبة، المحبة هي الحاجة الوحيدة اللي ماتجيش بالبروباقاندا…ما نجمش نعمل إشهار لشخص باش تحبه، ولا لبلاصة باش تعجبك…المحبة تجي من القلب كيف الإنسان يرتاح، يطمئن، يحس بالأمان والثقة والاحتواء…
كيف بوك يغتصب.ك (وهذا يصير للأسف)، كيف أمك تضربك وتطيح لك قدرك، ما تنجمش تحبهم على خاطر ماكش حاسس بالأمان…البو والأم يحتضنو، يرافقو، يعاونو، يغلطو أكيد، أما بنية طيبة وما يوجعوش ضناهم…
كيف كيف البلاد، كيف الإنسان يتوجع ما تلومش عليه كيف يهرب بجلده…
أنا مستورة، الحمد لله، امراة كبيرة، طلباتي ماعادش بارش، عندي أهلي نموت عليهم، وعندي أصحاب أغلى من الديامونت ، نخدم خدمة مستقرة ومحترمة في خدمتي، عندي اعتراف نسبي من بلادي ومن البره، علاش باش نخمم في الهجرة؟
أما التجربة علمتني نحط روحي في بلاصة الناس، الشاب والشابة اللي مسكرة في وجههم، منين يدورو يلقاوها ظلام، الشاب والشابة اللي في بداية حياتهم لا ينجمو يعملو كرهبة إلا بطلوع الروح، أما الدار حلم مستحيل المنال، اللي يخافو من البراكاج في الشارع، ومن التعطيل في الإدارات، اللي يخافو من إهانة العرف، والزور صوردي اللي ما بجيوش حق الكراء، كيف يلقى حل في أرض ربي الواسعة، نخونوه ؟ نسبوه؟ معناها ما يحبش بلاده؟
لا هو يحب بلاده، أما هي ما عرفتش تحبه…
المحبة موش إشهار، نبنيو تونس الحلم فيها ممكن، وتو تشوفو المحبة كيفاش تزهر كيف النوارة…
كل واحد يعرف ظروفه، وما يحس الجمرة كان اللي يعفس عليها…
وربي يهدينا على بعضنا على خاطر أكبر مشكل هو أننا ما عادش نحبو بعضنا…كيفاش البلاد باش تحبنا؟؟؟