اش قولكم لو نداويو الجنون بالهبال ..؟ عبد الكريم قطاطة
حكم صومالي معيّن للمشاركة في ادارة مقابلات كاس العالم وهو من افضل الحكام في افريقيا ..يوصل الحكم للولايات المتحدة يقع طردو من المطار لانو سي وخينا مجنون امريكا عندو مشكلة مع الصومال .. يخخي الفيفا موش تقول لا دخل للسياسة والسياسيين في الرياضة ؟ يخخي اللي عملو الطرمبة موش كفّ للفيفا وللكاف ؟ موش طيحلهم قدرهم وقت تعامل بمقولة انا ربكم الاعلى ؟ يخخي جماعة الفيفا والكاف ما فيهمش راجل ويقرر انسحاب كل الدول من كاس العالم ؟ ويخليو ترامب يعوم في الناشف ؟ يخخي ماهياش فرصة ذهبية باش اللموشي يخرج من مشاركتنا كيف الشعرة من العجين ؟ حمدلله جات منّك يا ميضة انت ناشفة وانا تارك صلاة ؟ راهو موش عبدالكريم اللي تعرفوه يحاول ديمة تغليب العقل على العاطفة هو صاحب التدوينة ….راهو اللي كتب هالتدوينة عبدالكريم المهبول .. يخخي موش الفم الابخر دواه السواك الحارّ . واذا نرجع نكتب بالعقل نقول ..برشة مشاكل محليا واقليميا ودوليا تحبلها رجال ومعاهم حراير ..وهي عملة اصبحت نادرة جدا …. …
مواضيع ذات صلة
