اعرف حقّك …مع الاستاذ سامي القلاّل

الحاكم هد على الحومة وهز ولد منيرة… حد ما فهم وين هزو وإلا شنوة ماشي يصيرلو

جات منيرة تجري تحب تستفسر على ولدها وما يستنى فيه

حاولت نهديها…

وقلتلها: ولدك حقوقو مظمونة بحول الله ما تخافش عليه.

قالتلي: كيفها ؟؟؟            

قلتلها: من 2016 عملو القانون عدد 5 إلي يضمن حقوق الناس إلي كيما ولدك، الله يفرج عليه، قدام البحاث.

قالتلي: أما حقوق يا وليدي، ولدي هزوه شكون ماشي يراها وإلا يكلمو، قلبي عليه نار، وإنت تقلي قانون وحقوق.

قلتلها: إسمعني… وأعرف حقك وحق ولدك…

قالتلي: قبل كل شيء يا وليدي قداه ماشي يخليوه عندهم…

قلتلها: أول حاجة ما ينجموا يشدوه عندهم إلا بإذن كتابي من وكيل الجمهورية وإذا إلي تشد عليه مخالفات ما يبقى بحذاهم إلا مدة السماع باش يا خذوا أقوالو وفي جميع الحالات راهو في أقصى الحالات يقعد 24 ساعة أما إذا كانوا متهم بجنحة والا جناية فإن مدة الإحتفاظ هي 48 ساعة ويمكن التمديد في الجنحة بـ 24 ساعة وفي الجناية بـ 48 ساعة.

قالتلي: كلام صعيب … شنوة الفرق بين المخالفة والجنحة والجناية ؟؟؟

قلتلها: المخالفة هي جريمة بسيطة عقوبتها يا خطية يا حبس بـ 15 يوم على الأكثر والجنحة عقوبتها بين 16 يوم و5 سنين حبس والجناية فوق الخمسة سنين حبس وتوصل للإعدام بعيد الشر.

قالتلي: وشنية حقوق وليدي وهو في الحبس مطيش وإلا الله يعلم بيه وين وكيفاه حالتو؟؟؟

قلتلها: أهم حاجة توة ينجم هو وإلا إنت وإلا أي واحد يطلب إنابة محام يحضر معاه في البحث و المكافحة عند البحاث، وأكثر من هكة إذا كانت الجريمة المشدود عليها جناية وما ختارش محامي وطلب هو محامي معاه لازم يتعينلو محامي.

قالتلي: كيفاه هذي يا وليدي؟؟؟

قلتلها: رئيس الفرع الجهوي للمحامين وإلا إلي ينوبو يعينلو محامي.

قالتلي: إيه والمحامي شنوة ماشي يعمل غادي ؟ موش ياقف كان قدام القاضي؟

قلتلها: بالضبط هذا الجديد إذا اختار محامي للحضور معاه، في هاذي الصورة ما يتم السماع أو إجراء المكافحات إلا بحضور المحامي إلا إذا هو بطل اختيارو للمحامي صراحة أو إلا المحامي ما مشاش في الموعد. وفي القضايا الإرهابية يمكن لوكيل الجمهورية ما يسمحش للمحامي بزيارتو ومقابلتو وحضور سماعو أو مكافحتو بغيرو أو الاطلاع على أوراق الملف لمدّة ما تتجاوزش 48 ساعة من إلي تشد.

قالتلي: شنوة ما شي يعمل المحامي معاه؟؟؟

قلتلها: المحامي يحضر معاه كل الإجراءات كيما قلتلك وينجم يدون ملاحظاتو في المحضر وينجم يسأل زادة، وحتى كان سيبوه ينجم يختار محامي للحضور معه وقت سماعه أو مكافحته بغيره.

قالتلي: وكيفاه نطمن عليه أنا توة ؟؟؟

قلتلها: المحامي ينجم يزورو ويقابلو وحدو لمدة نصف ساعة، أما مرة واحدة طيلة المدة إلي شادينو فيها، إلا في صورة التمديد ينجم هو و إلا محاميه طلب المقابلة من جديد.

قالتلي: الحمد لله يا وليدي طمنتني … خليني نشوفلو محامي يضمنلو حقو…