اعرف حقّك …مع سامي القلاّل …الكراء بدون عقد كتابي
منيرة خلالها راجلها دويرة تستقات من كراها هي وصغيراتها، كراتها للمنير بالكلمة لا ورقة ولا ستيلو، كيما يقلوها بالثقة ولد حومة وأم منير ومنيرة جيران الساس بالساس…
نهار من الأيام منير تنكر للعشرة والمعروف وما عادش يحب يخلص الكراء ومنيرة صبحت بلا مال ولا قوت ولا عندها جاه باش تقاومو وفوق هذا الكل يهدد فيها ويقلها من غير وراق ما عندك ما تعملي…
نلقاها محتارة في عتبت دارها ولا عارف وين تقبل ولا شتعمل…
ناداتني وقالتلي: يا وليدي جابك ربي، إيجا نقلك، سمعت هاكة منير شعمل فيا بعد الماء والملح والعشرة… دلني وليدي على طريق الخير يدلك على الشهادة..
قلتلها: ميمتي ما تخافش حد ما يضيع حقو بقدرت ربي
قالتلي: كيفاش ياوليدي وإنت تعرف إلي الكرية بالكلمة وما عندي حتى ورقة ولا تصحاحة عليه
قلتلها: أول حاجة تنجم تعمل عقد شفاهي، وريقة تتعمر في القباضة وتخلص معاها معلوم معين أما ما يكفيش قدام المحكمة.
قالتلي: ما لا شعملنا يا وليدي أهو درنا درنا ورجعنا للقلب الرحى.
قلتلها: نجمو نشوفو عدل إشهاد يخرج يعملو إستجواب ويسألو على صفتو وبقداه الكرية وإلي نحتاجوه الكل والإستجواب يعتبر حجة رسمية قدام المحكمة نطالبوا بها بحقك على ضوء ما جاء فيه هو والعقد الشفاهي.
قالتلي: وليدي الكلام ساهل وكان ينكر وإلا ما يجاوبش.
قلتلها: نجمو نعملو شكاية جزائية في الإستيلاء على ملك الغير في الأخر الملك ملكك وما يستوطن فيه حد بلاش صفة وكان جاوبنا يا نعيم أنعمت علينا.
قالتلي: إن شاء الله يهديه ربي ويجاوب.
قلتلها: كان جاوب وقتها لازمنا نعملولو تنبيه عن طريق عدل منفذ يا باش يخرج وإلا باش يخلص كيما تحب
قالتلي: إيه يا وليدي هات يخلصني باش نعيش… أما هذا الكل ولتوة لا وصلنا للفليسات
قلتلها: كان خاف وخلصك فبيها وإلا لازم قضية إستعجالية في المحكمة ووقتاها القاضي يصدر حكم نجمو نعملولوا من بعدو عقلة على دبشو ونبيعوهم من غير ما نستناو الإستئناف وتاخو حقك وهكك ما يضيع حق حد عند حد.
قالتلي: الحمد لله يا وليدي طمنتني … خليني نشوف محامي يحركلي على حقي…
قلتلها: أما يا ميمتي ماعادش تكري بالكلمة الثقة رخصة في وقتنا هذا وكيما يقلوها الثقة في الوثيقة أك تشوف كل شيء جايز أعمل كتب ما تعرفش على الزمان شنوة مخبي للماليه.
قالتلي: والله قلت الحق يا وليدي…
أعرف حقك… والحق يعلو ولا يعلى عليه
مواضيع ذات صلة
