السّياسة في تونس…أمرها واضح جدّا…افرقوا الحضبة…ألفة يوسف

هو باش نكونو واضحين، واحتراما لأصدقائي وصديقاتي اللي يبعثو لي في الخاصّ، صحيح اللي جزء كبير من عدم الخوض في الشّأن العامّ بشكل مباشر هو الخوف…
لكن السّبب الأعظم هو اعتقادي التامّ أنه مشكل تونس الأساسيّ في شعبها السّمح…موش في حكّامها السّمحين…
عمري ما ننسى ناس نهار 10 جانفي تمدح في بن علي، ونهار 11 صبحت تسبّ وتقشتل وتهبّط في فيديوهات متاع سخرية وشتم…
عمري ما ننسى ناس لحم أكتافها من خير السّبسي يرحمه، وانخرطت في حملة go jo متاع يوسف الشّاهد، وكيف طاح الشّاهد عملوا أرواحهم ما يعرفوهش…لا وداروا عليه…
عمري ما ننسى ناس حطّت “الأزلام” في الحبس وعملت لهم قانون العزل، وتوّ تحكي على الدّيمقراطيّة والدّكتاتوريّة والحرّيات…
عمري ما ننسى ناس كليت معهم الماء والملح، وخرّجو فيّ شخصيّا إشاعات يعرفو اللي هي إشاعات لمجرّد الرّكوب على الأحداث…
عمري ما ننسى ناس شفتهم بعيني داروا على اللي يحكمو الكلّ…من واحد لواحد…وبعد يجي ينظّر لك على القانون والمبدإ ومصلحة البلاد…
طبعا، أنّك ما تنساش موش معناها أنّك ما تتجاوزش، بالعكس…
أنا اليوم مبدئي الوحيد إنسانيّ: نساند كلّ من هو في حالة هشاشة: الضّعيف والمسجون والمريض…ومشكلتي أخلاقيّة قيميّة…
أما السّياسة في تونس…أمرها واضح جدّا…
كلّ اللي حكمونا…بلا استثناء…خير منّا بااارش…وهذاكة آش نستاهلو…وربّي ما يظلم حدّ…
افرقوا الحضبة…