الطرائف المبكيات …عبد الكريم قطاطة

طرائف الانباء كما كنّا نسمعها في الازمان البعيدة كانت فعلا عبارة عن مجموعة من الاخبار تحتلّ فيها الطرافة موقع الريادة ..ولانّ الزمن لم يعُد كما كان اخترت لكم اليوم ثلاثة انباء وصفتها بالطرائف المبكيات .. الخبر الاوّل عدول الامين العام لاتحاد الشغل عن الاستقالة وعودته لمكتبه ..اش لزّك يا ولد الطبوبي على الاستقالة ؟ احنا عندنا مثل شعبي يقول حاشاكم كلب الفلّة غضب وولّى ..

الخبر الثاني يقول انّ سهام بادي متاع هاكة الجماعة قالت ان مليون و 200 الف تونسي عبروا عن اعتزامهم عن القيام باضراب عن المأكل والمشرب لاسقاط قيس سعيّد .. انا اسأل وبكلّ براءة ..هاسهام كيفاش عدّيتهم ؟ زعمة بالذكاء الاصطناعي ؟ يممة عليك يا سوناد الاضراب متاع مليون و200 الف تونسي عن شرب الماء سيسبّب لك حتما افلاسا تاريخيا .. الخبر الثالث يهم تعيين ولد اللموشي ممرنا للفريق الوطني التونسي لكرة القدم ..تعرفوه شكون اللموشي هذا ؟ هذا في تصريح سابق قال وبكلّ محقرانية للتوانسة انّه ليس تونسيا بل يفتخره بانتمائه الى فرنسا البلد الذي وُلد فيه وترعرع رغم انّ اباه تونسي ابا عن جدّ … شنوة معناها تحبونا احنا نفتخرو بيه ؟

عندي تعليق واحد ..واتوجه به الى زياد الجزيري .. ها زياد انت اثبتّ في كل حياتك الرياضية انك غيور على تونس وعلى علم تونس قولا وفعلا ..جاءت فرصتك لتمثّل كل تونسي وطني وتخرج في ندوة صحفية تعبّر عن استنكارك لهذا التعيين وتنسحب من هذه الفضيحة لانّو ودائما حسب المثل الشعبي التونسي ما ينكر في نسبتو كان الكلب حاشاكم ايّ كلب ما يتشرفش باسم تونس ماضيا وحاضرا لا نتشرف به وفي كل الاوقات .. لا تسقني ماء الحياة بذلة . …بل فاسقني بالعزّ كاس الحنضل . ….ماء الحياة بذلة كجهنم …وجهنم بالعز اطيب منزل .. 14 جانفي 2026 ..دخول الليالي السود بالتعبير الفلاحي ودخول الايام السوداء بتعبير ما حدث بعد 14 جانفي 2011