امريكا تحكي على فقدان الديمقراطية في تونس … عبد الكريم قطاطة

تعرفوها كثر الهمّ يضحّك ..؟؟… امريكا بالذات ما عندهاش حقّ تحلّ كشختها وتحكي على قليّم الديموقراطية لا في تونس ولا في زنجبار …احنا من حقنا كتوانسة نحكيو بين بعضنا ومع بعضنا على كل مشاكلنا وراهو عندنا برشة مشاكل ..هاكي كوجينتنا …اما ان يتحالف تونسيون مع امريكا او غيرها للتدخّل في شؤوننا فتلك امور لا يمكن توصيفها الا في خانة الخيانة العظمى … حتى حدّ لا ينكر انّو تونس عبارة على نحاسة تغلي بالمشاكل وفي كل القطاعات .. اما تونس راهي متاع التوانسة ..يتعاركو يسبوا بعضهم في الاخير هذا يصير بين افراد العائلة الواحدة ..وربما الوضعية خذات برشة وقت ومازالت تاخذ وقت. باش تونس ترجع كيف ما يحبوها التوانسة النظاف والوطنيين .اما هذا موش تبرير للاستنجاد والاستقواء بالخارجي ضدّ بعضنا البعض ..لا وشكون عاد هاكي البلاد اللي استنجدو بيها بعض الخونة ؟ امريكا …يا عالم ..امريكا ومنذ نشاتها ابادت الهنود الحمر السكان الاصليين للبلاد وعبر كل تاريخها اثبتت انّ تبجحها بمفردات من نوع ديموقراطية وحقوق انسان وحرية هي ماعون صنعة لا غير ..والاكيد اخر مشهد متاع قهر وظلم واستبداد ما حدث ويحدث في فلسطين الحبيبة .. تبّا لكلّ من يبيع بلده وعلمه من اجل حفنة من الدولارات او من اجل كرسيّ حُكم ..واذا قيل لهم لا تفسدوا في الارض قالوا انما نحن مصلحون لا انهم هم المفسدون ولكن لا يشعرون …