توة انا تونسي وهذوما توانسة …؟؟… عبد الكريم قطاطة

يؤلمني ويزعجني ويدهشني وانا اقرأ تدوينات لاناس خيروا الاستيطان في بلدان غربية والابتعاد عن وطنهم … نعم ومهما كانت الاسباب نعم يدهشني ان اقرأ لهم كتابات لا تمتّ بصلتهم الجينيّة لتونس … انا عندما كنت طالبا في فرنسا لم استطع نسيان تونس والعيش بعيدا عنها …

نعم كنت طالبا بمنحة وكنت اعمل المستحيل لاوفّر ثمن تذاكر طائرة ومصروف العودة الى تونس مرّة كلّ ثلاثة اشهر ..كنت طالبا بباريس .. وما ادراكم ما باريس ..عاصمة الانوار وبكلّ ما في الكلمة من معاني ..لكن اقسم لكم بالله انّ _ جردة قازة او كربيلة في حوشنا القديم بصفاقس اجد في نورها كلّ شموس الدنيا ..خللي عاد من عشوية في وسط الحوش والحبقة على يميني والمذياع الذي يعمل ببيلة على ظهره على يساري وام كلثوم تشرقع احيانا وبوديّة احيانا اخرى ..ويختمها الجموسي بريحة البلاد يابا ورد وياسمين يا با يابا ..

تي اما جاك برال واما ميراي ماتيو واما ايديت بياف ..تونس ومن خلال مدينتي صفاقس هي الورد والياسمين هي الريح شلوق وهي الاسواق الشعبية وهي طوابي الهندي وهي الخبز والمرقة والموبيلات الزرقة والكحلة والبيضة يوفنتس العرب . واللي نقولو انا على تونس من خلال مدينتي صفاقس يقولو ايّ مواطن تونسي يحب بلادو من خلال خصوصيات الجهة متاعو .. وناديه المفضّل ….تونس لم تصنّف يوما من البلدان الغنية ولكنها في عيني اغلى بلدان الدنيا من شمالها الى جنوبها ومن شرقها الى غربها .. باش يقول القائل ؟ بعطر ها الفواح الذي لن تجده في ايّ مكان في العالم ..تنجموا تقولو عليّ مهبول ..يعطيكم الصحة هاكي هي انا مهبول ببلادي وبتاريخها وبرجالها ونساها ماضيا وحاضرا … صحيح تونس مرضت عديد المرات في تاريخها اما وهذه نعمة من نعم الله عمرها ماذبالت وعمرها لا تذبال . ياما حاولو ا يمرمدونا ياما حاولوا يمعسونا ويذلونا ويقهرونا .. وفي الاخير حاربناهم وانتصرنا عليهم وعادوا الى ديارهم يجرون اذيال الخيبة ..

اي نعم اقراو تاريخنا توة تتاكدوا … وسنكون نحن وابناؤنا واحفادنا دوما كذلك تجاه كلّ من لا يريد الخير لتونسنا …نرجع لهاكة الجميعة اللي عملوا من اوروبا ومن الغرب عموما مقرّا لهم ..زعمة زعمة مناضلين ..وحقوق انسان وديموقراطية ..زعمة هذوما عرفوا معنى تونس وعطر تونس ؟؟ زعمة هذوما مرتاحين للنعيم الوهم اللي يعيشوه خارج تونس ؟؟ وباش ما نظلم حتى حد ..نقول يا امّا انا سافا با في مخّي يا امّا هوما سافا با في مخهم وفي قلوبهم اذا عندهم قلوب وراني نحكي على القلب الادمي الملآن اوردة وشرايين فيها الكريات البيضاء والحمراء كيف علم تونس موش على قلوب تركيا اللي اتملاو بيها حوانت الفواكه الجافة وشوفو عاد هاكة التوريد الهائل من عند الشيخ اوردوغان ….نعم بلادي وان جارت عليّ عزيزة ..واهلي ان ضنّوا عليّ كرام ..