توضيح وشهادة في موضوع الهجرة….عادل اللطيفي

قاعد نتابع في الكلام اللي يدور في تونس حول الهجرة والتفاوض مع أوروبا، ونلاحظ انو الناس مركزة على المهاجرين جنوبي الصحراء فقط وكانو تونس “مشاة في العفس فقط” ونحنا بيدنا ضحايا. وتوة واحد في قناة تلفزية قال “اشكونهم هاذم؟ ماليين وكوت دي فوار ونيجيريين موش أحنا…”شخصيا، كيما سبق وقلت، نشتغل مع القصر المهاجرين اللي يتمتعو بحماية الدولة الفرنسية بقرار قضائي. في المركز اللي انا فيه من 2015 حتى ل 2021 وعلى 54 قاصر عدد التوانسة اللي تعدو علينا ما يفوتوش 6 والا سبعة.

حاليا واليوم عندنا 19 قاصر تونسي. وعلى فكرة، ولا واحد منهم لا من القصرين ولا من بوزيد ولا من قفصة والا جندوبة او نابل…. الاغلبية من نفس الجهة… على مستوى département Val de Marne اللي نحنا فيه، في 2016 كان عدد القصر من تونس ما يفوتش 5%. تم إبلاغنا مؤخرا من طرف السلطات الجهوية انو عدد القصر التوانسة بلغ 75%. وقيس على هذا في عديد المناطق.

قبل في المركز هذا كانت العلاقة عادية بين القصر التوانسة وغيرهم من جنوب الصحراء. لكن منذ تصريحات قيس سعيد العنصرية، لاحظنا توتر في العلاقة وانتهى مؤخرا بتبادل عنف بين قاصر تونسي وآخر من جنوب الصحراء على خلفية كلام عنصري. في ها الجو المشحون ومباشرة بعد كلام قيس سعيد، مرة حبيت نجس نبض شاب تونسي عنا على رايو في ها التصريحات.

قالي “بصراحة حتى هوما (الافارقة) كثرو في تونس. قتلو هاو الفرانسيس يقولو هنا “التوانسة كثرو”، تحب انت اشكون يجيك توة يروح بيك لتونس؟ سكت وما عرفش اش يجاوب… لذا شوية تواضع، رانا فقراء ومساكين من بين مساكين ها العالم…