ثمة شكون يتكلم ..وثمة شكون يفشلم ..عبد الكريم قطاطة

اللي يعرفني يعرف انّي في الكورة نتكلم بعقلي ومع ايّ فريق .. انا وقت كتبت على ساقية الداير كتبت بادلّة ما فيهاش جدال ..قلت افضل فريق في المجموعتين في الرابطة الثانية ..وادلّتي في ذلك انو عندو وفي المجموعتين كمان افضل خط دفاع وافضل خط دفاع ..منذ قليل ازاح التقدم الاولمبي الباجي من مسابقة الكاس بضربات الجزاء …ولكن ثمة للاسف ناس تفشلم ..وماهياش حابّة تتربّى ..الاوّل قلك جماهير الترجي بدات تقصّ لمقابلة النهائي في الشمبيونزليغ في المغرب وقبل مقابلتي الذهاب والاياب مع صندوانز .. توة هاكة السيد مازال يورّي وجهو بعد خسارة المقابلتين ؟ والثاني يوخّر ويقدّم ويقلك جمهور الترجي. ظاهرة كونية ..هذا زعمة يعرف جماهير الريال والمان يونايتد وجمهور ليفربول متاع YOU WILL NEVER WALK ALONE A اي وليفربول في عزّ ضعفو يخرج جمهورو ويقللو لن تسير ابدا وحدك ويعيده الى منصات التتويج ..وزيد جمهور البايرن ..وجماهير امريكا الجنوبية الارجنتين والبرازيل .. الاكيد انو الترجي عندو قاعدتو الجماهرية العريضة اما ظاهرة كونية ؟؟ هذي وافية برشة ..هاالنوعية عمرها ما تفرجت في مدرسة المشاغبين وقت قال عادل امام بتحط نفسك في اماكن بااااااايخة … ما ثماش واحد ما يحبش الانتصار لفريقو حتى لو كان من الدرجة السادسة لبطولة بلاد الواق الواق ..اما عمرك لا تمتّع لسانك قبل اجراء ايّ مقابلة ..علاش تخللي الناس تضحك عليك وانت تتقرّع عليهم بغول افريقيا وقتها شنوة نقولو على الاهلي المصري باش غول متاع افريقيا ؟؟وبزيد عاد هاكة المحللين كيف الساندرية وعمّك رضا اللي لعب في الريال يخخي ما شعفش من شلاغمو اللي حجمهم في الخليج وقت راهن على خسارة فريق …وهاكة القوبنطيني و هاكة شوشان وهاكة الزواوي والسحار التليلي اللي وفي مقابلة وهو ممرن النادي البنزرتي في سوسة كسبها ومنّع بنزرت من الطياح ووقت سالوه على جمعيتو المفضلة اللي هي الترجي يوخّر ويقدّم ويسبلها القراقر متاع جد والديها بعبارات كلها عفن وقذارة . .راهي كورة ومهبول ابن مهبول ابن مجنون ابن معتوه اللي يامنها .. ونعاود نقول عندي اصدقاء مكشخين احترم جدا تواضعهم وخاصة موضوعيتهم وقت يحكيو على جمعيتهم ..اقراو تدوينة زميلي وصديقي عبدالقادر مقري على فريقو الترجي بعد خيبة اليوم امام صنداونز …