حكاية للجماعة الي يقولو: ياخي ربّي آش مدخّله؟…الفة يوسف

بما أنّه ثمّة ناس ولاّت تتقلّق من عبارة: الله يفرّج على فلان…ويقولو: ياخي ربّي آش مدخّله؟
باش نحكي لهم ها الحكاية:
يحكيو على رجل هبط يعوم والبحر هايج، حسّ روحه باش يغرق، بدأ يعيّط ياربّي عاونّي، يا ربّي منّعني…تعدّى بجنبه سبّاح مدّ له يدّه، قال له: لا، ربّي باش يعاونّي…بعد شويّة تعدّات بحذاه فلوكة، حبّوا يطلّعوه فيها، قال: لا، ربّي باش يمنّعني…الحاصل، وصل للموت، وهو يصيح: يا ربّي علاش ما منّعتنيش؟ جاوبه ربّي: زعمة شكون بعث لك السّبّاح والفلوكة؟؟؟
ربّي ييسّر الأسباب…كيف نقولو ربّي يفّرج على شخص، ممكن الفرج يجي عن طريق طبيب ماهر، عن طريق قاضي شريف، عن طريق إنسان ما ماتش في قلبه الضّمير، عن طريق مجموعة ظروف تتنظّم بشكل ما يتصوّروش البشر…
فبحيث، وقيّت باش يفهمو بعض اللي عندهم فوبيا من كلمة “ربّي”، أنّه ربّي أكبر من تصوّراتهم الطّفوليّة، وأنّه ربّي أكبر من الأديان زادة…
ليس سوى الله…وكلّ ما يجري هو بأمر الله…ويكفي أنّه جرى…ولو لم يكن بأمر الله لما جرى…
وربّي يفرّج علينا جميعا…