خرافات عمي الباشير الرمضانية : شيخنا والوجه العبوس

يا سادة يا مادة يدلنا ويدلكم للخير والشهادة ويجعل ايامكم كلها ايمان وعبادة اليوم نحكيو خرافة الشيخ العبوس القمطرير

يحكيو على راجل كبير يعيش وحدو في دار واهل القرية الكل يكرهوه على خاطر ديما كاشطها ويخمم ووجهو مقلوب وما عندوش كليمة حلوة والضحكة ما يعرفهاش الناس الكل هجرتو وبعدت عليه وهو سنوات على هالحال ما يكلم حد وما يكلمو حد وبعد هالسنين جات اشاعة اعتبروها كذبة تقول الاشاعة الي الشيخ ضحك وتبسّم ووجهو اصبح مشرق وبشوش ما صدّق حد وكيفاش يصدقوا ان الشيخ يتبسم موش يضحك

اي سيدي زاروه وبالحق تبسملهم وضحكلهم حبوا يعرفوا السر قاللهم : انا اليوم بلغت 80 سنة وطيلة هالمدة نجري في جرة السعادة وما لقيتهاش اليوم قرّرت باش نعيش من غير سعادة ونستمتع بحياتي ..واكتشفت اليوم فقط اني سعيد …سعيد على خاطر ما جريتش في جرة السعادة

اي بر صحة شريبتكم

حافظ