شوية موضوعية للتاريخ …الفة يوسف

راني ما عنديش مشكلة مع كلمة “انقلاب” في ذاتها…
ياخي بورقيبة ما تقلبش على الباي؟ وبن علي ما تقلبش على بورقيبة؟ و14 جانفي شنو؟ ما هو انقلاب ..
ممكن تكون انقلابات “مشروعة”…نقولو واحد حب يعمل جمهورية…أما عمل حكم مدى الحياة…والآخر حب يمنع البلاد من رجل في ال80 ومريض وما سلمش في الحكم…وولات الحاشية هازة البلاد في حيط…وجماعة 14 واللي وراءهم قالوا اللي بن علي كبش في السلطة كيف التنبري…والطرابلسية عملوا بعمايلهم…وهذا صحيح…
السؤال هو اش عملت بعد الانقلاب…بعد ما فكيت ها السلطة المحنونة اللي البشر يتقاتلو عليها من أول الدنيا.
بورقيبة بنى دولة وطنية…صحيح حط مثقفين في الحبس وهذا يتحاسب عليه…أما ثمة صحة عمومية وتعليم عمومي ومصعد اجتماعي…
بن علي أحاط روحه بكفاءات…والبلاد كانت تدور بشهادة المعارضين متاعه…كيف مشى خلى فلوس في الخزينة واقتصاد ماشي…ونسبة نمو محترمة ما عادش نحلمو بها…منظومته زادة أكيد ظلمت ناس وحطت أبرياء في الحبس وضيقت على المعارضين…
من 2011 ورد لتالي ..لا اقتصاد لا تنمية ولا رؤية تنموية…صراعات وصراعات…كل واحد يقول لك خاطيني، موش مني، من اللي قبلي.. وفي البداية ما ثماش تنمية وثمة حريات…وبعد توصل لمرحلة: خسارة الميت وخسارة الكفن…
الحل؟ تو يجي وحده . كيف كل شيء في الدنيا…أما اذا باش نعاودو نفس الاسباب باش نوصلو لنفس النتائج…
والسلام…
ملحوظة ها النوع من التدوينات ما يعجبش الناس…أغلب البشر يحبو يسمعو اللي هوما صحاح 100 في ال100 والآخرين غالطين 100 في ال100…