صفاقس تريد ماء….لا تدشينات …حاسم كمّون

في صفاقس عنا محطة تحلية مياه من 2024…المشكلة موش في وجود المحطة، المشكلة في عدد التدشينات متاعها!كل عام تدشينة جديدة، صور جديدة، تصريحات جديدة… أما الماء مازال يعمل فينا “On/Off” كيف الwifi الضعيف، خاصة في العمارات والأحياء المرتفعة و قرية الشفار الي بعيدة سبعة كلمترات على اكثر محطة تدشين في العالم. الجمعة هاذي عشنا تدشينة جديدة… ويمكن موش الأخيرة.بالوتيرة هاذي، صفاقس مرشحة تدخل موسوعة الأرقام القياسية: أكثر محطة تحلية تم تدشينها في العالم، وأقل مشروع خلّى المواطن ينسى يسأل كل يوم: “ياخي الماء موجود ولا لا؟”ولّى فتح الحنفية في بعض المناطق أشبه بعملية استطلاع: نحلّ الروبيني… ونستنى النتيجة!المواطن في صفاقس اليوم ما عادش يطلب تدشين جديد، يطلب حاجة أبسط برشة: ماء يوصل للحنفية بانتظام… والباقي خليوه للصور والخطب.