غمزة … وتنجّم تكون همزة … لبعض البشر … عبد الكريم قطاطة

ثمّة نوعيّة من البشر ربي وقت خلقهم خلقهم وهوما لابسين نظارات سوداء … وديمة نظرتهم لكلّ ما يقع في الحياة ما ينجمو يشوفوها كان بالوان سوداء واذا عملو مجهود صغيّر او حشمو على ارواحهم يشوفوها بالوان رماديّة … تحبّو نعطيكم امثلة لهالبشر ؟ شدّوا عندكم .. لنفترض مثلا انّ الغيث النافع عندو مدّة ما صبّش ..ووقت ربّي يرحمنا الناس الاسوياء يستبشرو و يقولو الحمد لله ربي يزيد ويبارك ..او يهنّيكم الروى ..هالطاسيلة متاع البشر تعرفو كيفاش يعلّقوا ؟ تعاليقهم هي من نوع ..حتى احنا متنا بالعطش باش ربي رحمنا ؟ او اش ماشي يصير فينا في هاكة الثنايا المسدودة ..او باهية المطر اما صغارنا دبشهم يتمسّخ وزيد التزقزيق و ديارنا تولّي لا يورّيك ويلا يفاجيك باللبّز والطبعة ..طاسيلة اوكي اما لكن .. لكن هاكي تقولشي مطبوعة تحب لسانهم .بالسكوتش .. نفس الطاسيلة تقول لواحد منهم صباح الخير . هو .يرجّع عليك لا محالة … اما في داخلو يقول زعمة شبي لون صوتو هكك وبرّة اليوم ؟.. تقوللهم يرحم والديكم ..يقولو اوكي لكن زعمة علاش ناوي السيّد ؟؟ اليوم ونفس هاكي الطاسيلة تعبّر عن فرحتك بانتصار الغالية 4 اهداف مقابل صفر .. يجاوبوك ..تي كان من قبل . اش نعملو بيه هالانتصار ؟.او ما تنفخوش الملاعبية وانا ذكرت الملاعبية باحترام اما هوما يكتبوها بكلّ النعوت القبيحة والنتنة كيف لسانهم … ويزيدو يفحّلوها في الاخير ب _ ما نفهموا شيء وما نقولوا شيء كان ما يجيبو طرح بنزرت والنجم … تسمع فيهم يا غوارديولا ..هالطاسيلة لو كانت عندك في المان سيتي راهم طردوك منذ 6 او 7 اسابيع وانت يا انشولوتي كيفو راهو نهار اللي خسرت الكلاسيكو راهو يومها موش لغدوة لقيت هالطاسيلة يعيطولوك فاليجتك ولنقار في اتجاه ميلانو … لا لا ياطاسيلة ..انا اقسم بالله وقت الغالية تنتصر على فريق من القسم السادس عشر بهدف لصفر نفرح ..وكان لزم نشطح .. نعم انا نعرف انو الغالية تمرّ بظروف صعبة .ونعرف انو نتائجها مؤلمة .ونعرف انو امورها ضبابية .ولكن اوّلا ..نقول ربي يقدّر الخير وثانيا مستحيل ما ناقفش مع جمعيتي ولكن دون نظارات سوداء ومع احترامي لهاكي الطاسيلة اقول لهم في عشقي وتدويناتي … لكم دينكم ولي ديني وعاشت السي اس اس شامخة على كلّ منبّريها سواء ..من بعض احبائها او من اعدائها . وحتى من بعض الاعلاميين والخرونيكارات … .. فقط رجاء من الجميع ماتعاودوش تحكيولي على شنوة وقع في نادينا بكلّ حيثياتو راني نعرفها وربما نعرفها اكثر منكم ونعرف اللي ثمّة برشة شانطيات يلزمها تتحلّ ..اما وكعادتي هاكي عايلتي وما نكتب عليها للعموم كان بالباهي وعندي وسائلي الخاصة باش نوصّل صوتي بهدوء وبرزانة الابن البارّ لكلّ مكوّنات النادي ..اما يستحيل ننشر صابون العائلة للآخرين ..ثمة واحد يسبّ بوه او امّو او اخواتو .. لا ويعطيك ربي اللي يسبّو ويقشتلو يقولولك بدافع الحبّ ..اقسم بالله اللي نقرا من البعض ونسمع من البعض الاخر مافيه شيء من الحب ..هو كلب بالفتحة فوق اللام …. لكن وانا مرة اخرى نختم تدوينتي بنصف الكاس المليان ..تحية امتنان وعرفان بالجميل للجمهور السمح والعظيم متاع السي اس اس ..الجمهور اللي تحوّل لقسمطينة واللي تحوّل اليوم لملعب حمادي العقربي .الدرس جانا منذ سنوات من جمهور ليفربول وهو يقول لناديه وهو في اشدّ ازماتو لن نتركك تمشي وحيدا .. وعلى منواله سلكت فئة من جمهور الغالية .. لهذه الفئة ارفع القبّعة .وذاك هو …الحبّ الحقيقي … والكوجيتو الحقيقي بالنسبة لي مع قلعة الاجداد يجب ان يكون _ احنا معاك في الانتصار وفي الانكسار _ …المرة هذي ماشي نطلب منكم بكلّ لطف ومودّة اللي عندو تعليق ايجابي مرحبا ..اللي عندو تعليق سوداوي يرحم والديكم يحتفظ بيه لروحو … 19 جانفي 2025 …