في علم السّلالات …عبد الكريم قطاطة

مع احترامي للعلم والعلماء في المجال الطبّي المرّة هذي مجبور انّي نقلّهم حساباتكم غالطة وغير وطنية بالمرّة ….تحكيو على السّلالات المتعددة الجنسيات منذ السّلالة الصينية حتّى السّلالة النيجيرية وعن اخطارها وسرعة انتشارها وعدد موتاها …ثمّشي واحد منكم كان شجاع وتحدّث على اخطر سلالة في تونس منذ 2019 ..؟؟؟… السّلالة البرلمانية _ بونية وماشطة وصياح وعويل وسبّان ورشقان فلوس وهرج ومرج _…؟؟؟ وثمّشي واحد منكم حكى على سلالة صمت قصر قرطاج …على الموت البطيء للشعب التونسي …؟؟. اليس فيكم رجل رشيد يعلّق اشغال هالبرلمان الكراكوز ؟ … راهو حتى بالصلاحيات اللي عندك يا اخ قيس تنجّم تعلّق اشغال البرلمان …مخزن مغلوق ولا كرية موش مشومة فقط بل تعيسة ومشوّهة لصورتنا في المحافل الدولية ….سامحوني على العبارة الخرافة _ صورتنا في المحافل الدّولية _ ….صورتنا في المحافل الدولية ….من زماااااااااااااان شُوّهت ودُنّست وتبوّل علينا اللّي يسوى وخاصّة اللّي ما يسواش …