محب وفي للنادي الصفاقسي يوجّه نداء لعشاق الابيض والاسود

نداء لكلّ الصفاقسيّة بالداخل و الخارج… نداء لكل الغيورين على القلعة… نداء لكلّ من يريد أن يرى النادي الرياضي الصفاقسي في أعلى المراتب
يا جماهير نادينا العريق، يا عشّاق الأبيض والأسود، يا أولاد وبنات صفاقس إلي فيهم دم النادي يجري، اليوم نحكيو من القلب للقلب، على وضع ما عادش ينجم يتسكت عليه.
النادي الرياضي الصفاقسي، إلّي فرّحنا سنين، و إلّي كان دايما منارة لكرة القدم التونسية، اليوم يعيش في ظروف مالية صعيبة، صعيبة بارشا… وضعية تهدد كيان الفريق، وتهدد تاريخه، وتهدد المستقبل متاعو.
نعرفوا إلي النادي ديما كان واقف برجالو، بجماهيرو، بأبنائه، لكن توا لازمنا ناقفوا الكل، يد وحدة، قلب واحد. ما عادش فمّا وقت للفرقة… النادي ينادي، يناديكم إنتوما، السند الحقيقي، الحصن المنيع.
اليوم، كل مساهمة، كيف ما كانت، تْعتَبر وقفة رجولية. كل صوت يدافع، كل يد تعاين، كل قلب يحب… ينجم يعمل الفرق. النادي ما يتصلّح كان بينا وبيكم. ما ينجم يرجع يشعّ، كان بيكم.
راهو ما فمّاش أغلى من حب النادي. ووقت النادي يتوجع، أحنا وجيعتنا تكون مضاعفة. خلّينا نردّوا الدين، خلّينا نكونوا حزامو وقت الشدّة، كيما كان هو فرحتنا وقت الأفراح.

مرسي القسنطيني