مستغربين من تلميذ جايب بهيم لليساي ومن تلميذة تاكل في المقرونة في القسم…الأستاذ خالد دريرة

مستغربين من تلميذ جايب بهيم لليساي ، ومن تلميذة تاكل في المقرونة في القسم .. ومن تلميذ عامل تحدي وبايت في الليساي .. مستغربين من تلميذ يتطاول على المدير قدام أمو وتلميذ يضرب أستاذو بساطور .. مستغربين من تلميذ موشم وفي محفظتو بوسعادة وقارو زطلة ؟؟؟لا لا ، ما تستغربوش على خاطر هذاكا هو الجيل إلي حل عينيه على مسلسلات العهر إلي تشرع للعلاقات خارج الأطر الشرعية وتشرع في الزطلة والكنترة وتبييض الأموال ، المسلسلات إلي دمرت الأسرة وهمشت دورها ، وهدمت القدوة وشوهت صورته في المجتمع ، وهمشت التعليم وكرست النظرة المادية وأن القراية ما عندها وين توَصَّل . مسلسلات جعلت من الرابورات قدوة بكلامهم السوقي والبذيء والكلاشات والبانديزم ، مسلسلات أباحت تعاطي المخدرات وشرعت شرب الخمر والعلاقات المحرمة ، بمنطق خلي الصغير يتفرهد ويشيخ وينسى همومو ويعيش كيف أندادو