هذي لاصدقائي اللي يعرفوني بلقدا …عبد الكريم قطاطة

بعد نتيجة ايّ مباراة سواء كان فريقك منتصرا او منهزما ..ريض شوية وما توليش تشطح على طار بوفلس .. هذا شنوة تعلمت انا بعد تجربتي مع كرة القدم منذ 65 سنة سواء كلاعب او كمسؤول وخاصة كمحبّ …نفرح ايه وقت الربح نتقلق ايه وقت الخسارة اما دائما اعود الى القاعدة الاصلية والاهم في كرة القدم ..الكورة ما فيها امان ..نعطيكم امثلة لهذا الاسبوع ..فريقي وحبّي الاكبر السي اس اس عامل 5 مباريت ربح وبالكلين شيت زادة ..اما مستحيل نكون من الفئة اللي تقول سايي نلعبو على البطولة .. علاش يخخي احنا نلعبو وحدنا ؟ يخخي العثرات موش جزء من قوانين اللعبة ؟ يخخي ضامنين لعبة الكواليس ؟ انا فرحان للكحلة والبيضة اما فرح معقلن . اما كيف ما قال احدهم ذات سنة الجيش موش مضمون والامن موش مضمون … . صحيح متعة الكورة في هبلتها ..اما بعد الهبلة نشربو عرقنا ويرجعنا الشاهد موش يوسف اما شاهد العقل . وحده العقل هو المنصف ..وموش منصف المرزوقي حاشاكم …نجي توة لفريقي الثاني الريال اللي ضرب موناكو ب 6 في الشمبيوزليغ .. انا مدريدي صحيح ولكن عقلي يقلّي انو الريال فيه برشة نقائص وخاصة في الدفاع ووسط الميدان اذن لا اندهش انو يخرج صفري الالقاب هذا الموسم ..برشلونة ايضا هو مهيمن حاليا على الليغا ويستحق الهيمنة متاعو لكن في الشمبيونزليغ حاجة اخرى لذلك صعيب انو يكون المتوّج ..ما قلتش مستحيل انا قلت صعيب …اللي نحب نقولو في دنيا الكرة مهبول اللي يبيع جلد الدب قبل ما يصطادو ..ومهبول ابن مهبول اللي يقول فريقي لا يُهزم ..نعرف اللي ثمة بعض الفرق تصيرلها برشة مجهودات في الكواليس باش هاكة الفريق بالذات لا يُهزم ..اما تاريخو يقول انّو اللي تلمدو النمالة في عام ياكلو الجمل في فم … اكهو ربي في الوجود .. 22 جانفي 2026 ..