وحدهم الصفاقسية في القراية ديما هوما لولين وحتى في غير القراية

قلك ياسيدي بن سيدك تو من عشرات السنين وصفاقس هي لولا في نتايج الباكالوريا ها المرتبة هاذي ما نجمت حتى ولاية أخرى تفكهالها ، خمسة وخميس على وليداتنا
هاوكا بمجهود الأساتذة في كامل ولاية صفاقس ووليداتنا التلامذة والوالدين العزاز والإدارات في الليسايات وما ننساوش الإدارات الجهوية . صفاقس جات هي لولى وزيد عدد الملاحظات حسن جدا وحسن وقريب من الحسن ، زعما شنو السبب ، حيت الصفاقسية ياكلو الحوت برشا ولا حيتهم يحرثو في القراية ووالديهم يحرصو باش يردوهم عرص تتبنى عليها تونس هاذا بخلاف اللي تفكو دول اوروبا وغيرها في العالم أجمع .
اوكا قلك المندوبية الجهوية صفاقس 2 هي لولى في تونس كاملة بنسبة نجاح اكثر من63 في المية تجي بعدها صفاقس 1 بنسبة نجاح أكثرمن62 في المية هاذا في الدورة الرئيسية بركا .
هذا الكل ما يارالك بيه حتى واحد صفاقس تولد وتربي وتقري وغيرها يفك ويستنفع .
أيا ما عليناش يكون في بالكم صفاقس هي لولا في حوايج أخرى لولا في التلوث وفي ضيق الشوارع اللي تغص بالكراهب في كل وقت وصفاقس مدينة ساحلية اما بحرها ما يتعامش بلكل توا عندو ستين سنة،أمالا الزعيم لحبيب بورقيبة يرحم عضيماتو هدالها السياب وآن بي كا NPK وزيد مطارها الصغرون ما يصلح كان للحجاج ، خطوط الغزالة ما تستعرفش بيه لا للمانيا ولا حتى جنوب فرانسا كي مرسيليا وغيرها .
اوكا باش يعرفو وليدانا اللي باش يكملو قرايتهم في الخارج بعد الباك راهو ما ثمة ركوب في الطيارة كان من مطار تونس قرطاج مشيان وجيان أمالا تنجح بتفوق وبركا يلزم تدفع فاتورة التعب والميزيريا كي تجي تسافر وزادا كي ترجع .

مَحمد التركي