وين العجب ..؟؟؟….. عبد الكريم قطاطة

بطولة تونس لكرة القدم مسلسل متاع عجايب وغرايب من هدف كونفيرمي يا فرج .. الى احترازات مشبوهة … الى مقابلة قريب يختارو ملعبها في زنجبار الشقيقة .الخ .. الخ .. الخ ..اخرها اصوات غريبة في غرفة الفار … ؟؟ اش معناها ؟ غرفة الفار مسكونة ؟ وين العجب ؟ وقتاش كانت موش مسكونة ؟ ثمّ ننساو غاب القطوس لعب الفار ؟ البارح مقابلة باريس سان جرمان وبايرن مونيخ درس كبير .. لعبا وتحكيما .. لو كان الدنيا دنيا جلّ حكامنا والمسؤولين يستقيلوا ..ويضعوا حدّ لمهازل هاكة العام حيوط الملعب اللي تتكلّم ومهازل امس حيوط الفار اللي تتكلم … وحيوط الاحترازات اللي تعيّط الشفاعة … وحيوط الكورة اللي فيها كل شيء كان كورة ..ومازال مازال .. اقسم بالله لو كنت مسؤول لا قدّر الله اوقفت الكورة من اجل الامن القومي . اي نعم والايام بيننا ..الكورة اصبحت خطر على الامن القومي .. ما اخطر منها كان تكوير الافارقة غير الشرعيين في بلادنا وتكوير مهازل حكوك الانسان وزعمة زعم هاكي النخبة النكبة .وذيولها …. وتحبوني منيش محبط ؟ تي راهو الاوضاع تجلط .. 29 افريل 2026 ..