يهديكم ربّي افهموني … عبد الكريم قطاطة

اصدقائي انتوما على راسي وعيني … لكن .. رجاء اولا .. قبل ما تهبطلي ايّ حاجة خوذ بخاطري وشاورني .. ثانيا وهذي للتذكير انا ارحّب بكلّ طلبات الصداقة وما نتكبّر على حتّى حد وما نحقر حتّى حد ..اما ثلاثة انواع موش لازم يتعبوا ويبعثوا بطلب صداقة .. النوع الاول اللي ما نلقى على صفحتو حتى معلومة تعطيني فكرة عليه _ اش يعمل ؟ شنوة قرا ؟ منين هو ؟ الخ .. وكذلك اصحاب الاسماء الفنية من نوع هارب لربّي او عاشقة الصحاري ..ممكن تحب تحتفظ باسمك ولقبك الحقيقي لاسباب شخصية نفهمك ونعذرك اما ايجاني على الخاص وقللي راهو اسمي كذا كذا ولقبي كذا كذا وما نحبكش تذكرو في الردّ عليّ نقبل رجاءك منيش خرشي واتفهم جدا مثل تلك الوضعيات ..اما نتحاور انا وصديقة اسمها عاشقة الصحاري ولا نعرف عليها لا انسانة لا حيوانة ..تي راهو حتى الغزالة عاشقة الصحاري وكذلك الارنب البرّي .. او انت يللّي هارب لربّي يخخي انا بوليس ماشي نوقفك في السيركيلاسيون ونطالبك برخصة السياقة متاعك ؟…. انا شفاف وكلّ معلوماتي على صفحتي ونحب نتعامل مع ناس واضحي المعالم يكون اسمو التوكابري او نوفل ..وتكون نيللي او مبروكة كيف كيف عندي … النوع الثاني وقت يبدأ حساب الشخص verroullé موش لازم تستنّى انّي نقبلك .. النوع الثالث انصار الاسلام السياسي . انا وياكم ماحناش فرد قماش .لكم دينكم ولي ديني …