يهديكم ربّي ما يخدعوكمش جماعة الاعلام العاصمي..عبد الكريم قطاطة

الدنيا قامت وما قعدتش لحدّ الان على دحمان وعودته لفريقه الام …انا نتفهم ونقبل كل المواقف لانّو انصار النادي ما هوماش دجاج جاكم … طبيعي اذن ثمة شكون مع العودة وشكون ضدّها … اللي موش طبيعي زوز حاجات ..انو الواحد منّا ياخذ مكان المدرّب ويقرّر موش فقط يقترح ..يقرّر شكون الحارس الاول وشكون الثاني …هذا امر غريب جدا ..يخخي الممرن قاعدين نخلصو فيه بحارة عظم في النهار ؟؟ راهو بالملاين ودورو … ودورو هو فقط ان يختار اي لاعب في ايّ مركز ..هو فقط موش احنا … لكن الاهم وهذي نقولها للجماعة اللي يدافعو على صبري واللي هو حتى حدّ ما ينكر انو حارس ممتاز للغاية وقدّم موسما استثنائيا اذن الجماعة اللي يعتبرو وجود دحمان ضربة موجعة لصبري يشيخو وقت يلقاو واحد من الاعلام العاصمي واللي هو في نفس الوقت عاصم … عامل فيها هيئة محامين على صبري وما خصهم كان يبكيو على المظلمة اللي ماشي يتعرضلها بن حسين لو اصبح دحمان الحارس الاول ..تقولشي مساكن موجوعين على نادينا وما يحبوش فيه دكّة الشوكة ..تي راني نعرفهم رهط رهط مع احترامي للقليل من الشرفاء منهم ..تي راني نعرفهم ويعرفوني ويعرفو اني منذ بداية السبعينات فايق بالرواند متاعهم …راهم عندهم كراهية سوداء لنادينا ..ويكفي انكم تعملو مقارنة صغيرة في مواقفهم عندما انتدب ذلك الفريق اللي تعرفوه حارس المنستير وهو عندو الحاس مميش ..وقتها شيء يعمل الكيف واحسن افار انتداب بن سعيد واللي افضل هو اللي يلعب ..شفتو اولاد شحيبر مواقفهم كيفاش تتبدّل من نادي لنادي ؟؟ شفتو كيفاش اولاد شحيبر ما يفلتوش كلّ فرصة باش يزرعوا المشاكل بين جماهيرنا ..احنا نختلفو وكل غديرة بعد تشرب ماها ونرجعو يد وحدة باستثناء هاكي الحارة متاع النكديّين طبعا ..اما ردّوا بالكم من اولاد شحيبر .. ما يلزمش يستبلهوكم ..وها انا انتظر ايّ واحد منهم للردّ عليّ …لن يفعلوا ذلك لانهم جبناء وانا وراكم وراكم والزمان طويل …واعيد التذكير بأني صديق لكلّ الشرفاء منهم ..واعيد القول ايضا هم قلّة … لانصار النادي فيقوا يرحم والديكم راهو البعض منهم يعتبرونا يهود تونس ..واقسم بالله نعرف شنوة نقول …