ألفة يوسف …أي شخص يعبر على رأي مخالف للسائد يشد الحبس
تو كيف نشوف أي شخص يعبر على رأي مخالف للسائد يشد الحبس، والا يمشي يبحث…كيف نشوف أي شخص يترشح للرئاسة يولي مطلوب، اش نعمل وقتها ؟
نسكت ونشد ببوشتي…ونفهم الحكمة العميقة متاع اوضاعنا…
نشوف الصفوف على المواد الاولية؟ نقول شكرا علمتونا نشدو الصف..
نشوف الغلاء الفاحش…(تو فهمت معنى الفحش)، نقول شكرا علمتونا الصبر والزهد والتقشف…
نشوف ناس في السجون؟ نقول لازم عاملين مصيبة ..وحتى كان ما عملوش؟ مصلحة الدولة فوق الأفراد…وسجن الثلثين ليصلح الثلث قرار حكيم وابعاده عميقة…
نشوف صحفيين يتعاملو كيف المجرمين؟ نقول وهو اش كان عليهم كان سكتو، والا حتى طبلو، ياخي شبيه الطبل؟ ماهو في سبرنا…لازم صحة الرأس…
نشوف الشباب والكهول يحلمو بالهجة، نقول أي شبيه خلي تتفرهد البلاد ويقعدو فيها كان الوطنيين الصادقين…
نشوف نسبة النمو اللي تبكي وتضحك…نقول أي شبيه المهم ارتحنا من عشرية الخراب…وارتحنا من المحتكرين ورجال الاعمال الفاسدين والمتآمرين…
الحاصل أول مرة نفهم المثل العميق:
اضرب القطوسة تستحي العروسة…
الحمد الله على نعمة الحكمة….
مواضيع ذات صلة
