إعتقادي البسيط أنّه كلّ واحد هو أنا….الفة يوسف

حاجة بديهيّة ينساوها النّاس الكلّ أحيانا، وأنا منهم…
راهي السّرديّات تختلف حسب البشر،والمواقع الاجتماعيّة والنّفسيّة والذّهنيّة والسّياسيّة وغيرها…
يعني عاديّ أنّه سرديّة مساندي صدّام باش تكون مختلفة على سرديّة اللي خرّجوه من الحكم…وقس على ذلك كلّ الأحداث الكبرى…اللي بوه من الاتّجاه الإسلاميّ وشدّ الحبس، موش باش يكون عنده نفس سرديّة بنت الوزير اللّي خدم في عهد بن عليّ ولقى روحه يبحث بعد 14 جانفي…
راهو كلّ شيء في الدّنيا تكييف اجتماعيّ، بأمارة أنّه كيف تسمع بواحد خالف القانون، تنجّم تقول يستاهل الحبس، وكيف تسمع بولدك عمل نفس العملة، تنجّم تقول: الشّيطان حضر، والنّاس الكلّ تغلط…
رانا بشر…وربّي خلق الكون قائم على التّناقضات والصّراعات…اللي ما يتجاوزها إلاّ هو بصفته المفارقة والمحايثة…وبعض البشر اللي يفتح عليهم ربّي أحيانا بشطحات يراو من خلالها كلّ شيء كيف كيف، وكلّ شيء من إرادة ربّي…وكلّ شيء فاني…
اعتقادي البسيط أنّه كلّ واحد هو أنا (لو كان عاش حياتي)، وأنا هو/ هي (لو كان عشت حياته/ا)…
وربّي يهدي الجميع…