الاخطاء السبعة للرئيس قيس سعيد

:1- أولا فاش قام تفعل في_الفصل ثمانين وتحل في البرلمان، كانوا مفرهدين على الشعب ونسب مشاهدة مسرحيات الجلسات فاقت جميع القنوات، صحيح ما عداوش قوانين لصالح الشعب أو لمقاومة الفساد أو للتأسيس لعدالة جبائية، آما معذورين، ما ينجموش يقطعوا أرزاق ممولي حملاتهم… صحيح فما برشا عنف وصراعات وتراشق بالتهم، آما يمثلوا حقيقة غالبية الشعب، ياخي جبناهم من المريخ….

2- ثانيا فاش قام تعلق في الدستور وتنقح فيه، راهو أقوى دستور في التاريخ يجرد الرئيس المنتخب مباشرة من الصلاحيات ويضعها بين أيادي الاحزاب النافذة لترهن رئيس الحكومة في المحابات والمحاصصات… دستور ديمقراطي يقاوم تجميع السلطات ويفتتها بين جميع المتدخلين، صحيح يعطل القرارات والمشاريع وتحديد الخيارات، آما ديمقراطي وما فيهوش حتى تداخل بين السلط أو تجاوز للنفوذ من المتنفذين السياسيين، والقضاء مستقل وغير مخترق والقضايا الكبرى اللي شادين فيها التوانسة ياخي باللزمة نفصلوا فيها، ما هيش أولوية…

3- ثالثا، فاش قام تحب تعدل المجلة الإنتخابية وطريقة الإقتراع، علاش ناوي تحب إطلع كفاءات للمجلس، مالحاجة لذلك، رئيس الكتلة ورئيس الحزب يعرف ما يصلح بالبلاد والعباد والبقية يمتثلون ويضغطون على الازرار،،، وجماعة الفلوس والتهريب شكون بيهم وشكون يمثلهم… تحب تنحي أفضل البقايا وتسكر اللعب على اللي طالعين بالدزان… شادين في المال السياسي الفاسد والتجاوزات الإنتخابية، تصير في جميع الدول والفساد يعم جميع البلاد جات في الأحزاب وحبست…

4- رابعا، فاش قام تقيل في أنجح حكومة، صحيح ما جابتشي التلاقيح للتوانسة وماتو في عهدها آلاف الأبرياء لنقص الأكسيجان وإرتفعت الأسعار وإنتشر الفقر والفرعنة والميزانية عاجزة وما عملتشي قانون مالية تكميلي، ما هو نصبروا عليها لين تتحسن وتتجاوز عجزها، ياخي الفشل جديد علينا، ما هو تعودنا عشرة سنين وفي الآخر نبقاو وخيان توانسة ونعديو لبعضنا…

5- خامسا، فاش قام تعلن في حرب على الفساد، نسيت إنو الفساد مسيطر على نصف الإقتصاد ويخلق في مواطن الشغل ويساهم في النمو والتنمية وفيه شكون يقدم في المساعدات ويوزع في الماكارونا على الفقراء…. ياخي كيف تقاوم الفاسدين والمحتكرين والمهربين والمتلاعبين بالمال العام شكون مش يشدلنا البلاد ويلقاولنا الحلول ويضمنولنا الشهاري تتصب كل شهر،…

6- فاش قام تحارب في اكبر حزب في البلاد هاذا كفوهم عشرة سنين يخدموا في البلاد وفي الديمقراطية… وزيد كيف تعزل أكبر حزب في البلاد شنوة مصير باراشوكاتها واللي متقاسمين معاه الغنيمة… واللي كانو عايشين على مهاجمتها، شكون مش يهاجموا ماهو مش يدوروها عليك إنتي…

7- فاش قام ترفع في شعار الشعب يريد، ياخي مشكلة تونس الشعب يريد وإلا مايريدش، ياخي الشعب ماهو صوت نهارة الإنتخابات، يزيه، يستنى خمسة وسنين، علاش مزروب… وزيد هذا ودونه، ناوي تستفتي الشعب في النظام السياسي والإنتخابي…ياخي الشعب يعرف أكثر من السياسيين شنوة يصلح بيه وشنوة النظام الاصلح ليه…فاش_قام_عليك، هذا الكلّ، عملت كيف المراحيم وتحالفت معاهم وراك شايخ، الأحزاب الكل تبشبش بيك ولا ندوات ولا بيانات ولا تهديدات بالمقاطعة….

الناصر البحري