الدّنيا حلو ومرّ على النّاس الكلّ…….الفة يوسف

تصوّر قسم فيه 30 تلميذ، كلّ واحد من والدين التّلامذة يحبّ ولده وإلاّ بنته يجيو الأولين في التّرتيب…هذا موش ممكن…مستحيل، لازم ثمّة الأوّل والرّابع والعاشر وكذا…علاش تحبّ ولدك بالسّيف يجي الأول، ياخي الأخرين موش آباء وأمّهات زادة؟
تصوّر أنّه ولدك وإلاّ قريبك عنده مرض كبير…الأمراض موجودة في العالم، وبالضّرورة ثمّة ناس باش تمرض بها…ما ينجّموش يمرضو كان “الآخرين”…
بعبارة أخرى، الدّنيا بطبيعتها قائمة على التنوّع وعلى الأقطاب…موش ممكن انت الوحيد من دون البشر الكلّ تعدّي حياتك كلّها من غير حتّى مشكل/ مطبّ/ وجيعة/ قلق/ خيانة إلخ…اللّهمّ إلاّ إذا كنت تحبّ هاذم الكلّ يجيو للأخرين، وتسلّكها وحدك…وهذا موش فقط مستحيل وإنّما أنانيّة خياليّة…
فبحيث، الدّنيا حلو ومرّ على النّاس الكلّ…وأبواب مدرّقة وهموم مفرّقة…ويلزم الإنسان يتعلّم يعيش مع هذا الكلّ، بأقلّ ما يمكن من التذمّر ومن الكره…على خاطر التّذمّر والكره عندهم وظيفة واحدة:
يزيدو يصعّبو لك حياتك هذي…والجاية…
نهاركم فلّ الفلّ…