الغوث … النجدة … عبد الكريم قطاطة

عندكم فكرة على فواتير الستاغ ..؟؟… والاصحّ عندكم تفاسير ليها ؟… انا والعديد ممن اعرفهم اصبحت فواتير استهلاك الضوء ارقامها من المليون فما فوق … علاش ؟؟ يخخي احنا عندنا معامل لتصنيع الزطلة ؟ يخخي عندنا دهاليز تحت الارض لصناعة السيارات او الموبيلات الزرقة ؟… لا وتمشي تقلهم راني مواطن عادي استهلك ككل المواطنين ما يحتاجه منزلي فقط ..اوّلا ما يغزرلكش .. ثانيا ما يعبركش ثالثا ينزل على فلسات الكمبيوتر ويحقرك ويقلك ..وتقولشي عامل عليك مزية وجيتو لدارو … صورلي المنقالة متاعك وارجعلي ..ونمشي نصورلو وتاكسي جاي وتاكسي راجع وتستنى دورك للمرة الثانية حتى يشتكي الصبر منك ومنه وتوريه صورة سيدتنا المنقالة حفظها الله ..ويقلك قداش تنجم تخلّص توة ..انا قلتلو اخر ورقة 365 د قللي برة خلّص كيف المرة الاخرى ..تي هي ديجا 365 للنظر والتحقيق ..نعاود نقلكم والله عندي دار كيف الناس الكل ونستعمل في الاضواء كيف الناس الكل ولا انتمي لاي حزب او جماعة او حتى للجولاني متاع سوريا ربي يحفظ سوريا منه ومن امثالو .. باش ننظم معاهم جلسات سرية للصباح في الكهف متاع داري واصلا داري ما فيهاش كهف ..ونقللو ايه وهاكي الفاتورة متاع المليون اش عملنا فيها …زعمة زعمة يعمل معاك مليح ويقلك توة نقسموهالك على الفاتورات الجاية ..معناها ذابحينك ذابحينك في الميلاد والا في العاشوراء …انا نعرف انو خاتمة كلماتي ربما ستكون وبالا عليّ اما نقولها ومرحبا يا موت ..بلادنا هايلة ..وخللي اللي ماشي يصير يصير منيش خير من سنية الدهماني وامثالها .. نقولها بلاد هايلة خير ما نموت بغبينتي ..