الفنان منذر بن عمار : نجيب الخطّاب رجل عملاق

كتب الفنان منذر بن عمّار عن الرّاحل نجيب الخطّاب رحمه الله فقال :

” باختصار شديد هذا الرجل هذا العملاق عندو فضل كبير عليا بعد ربي سبحانه و تعالى منحني اكثر من فرصة للظهور بل شبعنا تلفزة علمنا ناقفو قدام الكاميرا إلي قعد يخاف منها هو و يحترمها و يشدو التراك قدامها لآخر أيامه لانه يعشق عمله علمنا نحترمو خدمتنا و خاصة مواعيدنا و اكبر دليل برامجو الكل في المباشر يعني الدقيقة بحسابها علمنا ان النجاح مسؤولية اكبر و تواضع أكثر علمنا نحلم بنجاح أكبر و أكبر علمنا انو كل ما ننجح في امتحان وجب علينا العمل أكثر وأكثر للاستعداد للامتحان إلي بعدو ، كان صارما ، وغير متسامح مع الأخطاء ، كنت ديما نشوفو على أعصابو و كيف يعطيك فرصة باش تعبر على رايك لازمك تعرف تقنع في أقل وقت ممكن (و ربما الضغط إلي كان يعيشو هو إلي عجل بوفاتو في عمر 45 سنة) كان صعيب مع روحو و مع كل من يشاركه عمله فنان او تقني او مساعد … ولكنه في المقابل كان حنين على كل واحد من فريقو و كان لما يقتنع بيك يعطيك برشه فرص للبروز مثلا العبد لله ظهرت معاه برشه في برامجو و عمتلو اكثر من جينيريك في برامجو رغم إلي كان عمري صغير وولد حي شعبي اعتز به إلى اللحظة معناها لا عندي شكون يتكلم عليا ولا يتدخل لفائدتي نعرف إلي حتى توا ثمه منشطين مهمين نحترمهم و نحترم برامجهم و مجهودهم لكن كل ما نتفكر هذا الرجل رحمه الله نقول آش ماشي نعمل في التلافز آش باش نشوف آخر زعمه مازال ثمه بهرج و نسبة مشاهدة كيما كان في لو سمحتم مثلا؟؟؟ زعمه مازال الظهور التلفزي مهما كيما كان ؟؟؟ زعما الظهور مازال يساوي النجاح؟؟؟ برشه اسئلة تتبادر لذهني و تقلقني و هذاكه ربما إلي يخليني نرفض العديد من الدعوات للبرامج التلفزية مشكورين اصحابها طبعا و أكتفي بعالم الديجيتال من مواقع تواصل اجتماعي تتصوروا إلى حد الآن مازلت اعمل و كأني بديت اليوم ههه؟؟ ربما الأمل و الحلم إلي زرعهم فينا سي نجيب رحمه الله”.