اللي يمشي بكلام الفيسبوك ومهاتراتو ما يستحقش يكون رئيس لأيّ نادي…عبد الكريم قطاطة

لنفترض جدلا انو رئيس النادي اجتمع ب 100 شخص من احباء النادي و100 اعلامي مهتمين بشؤون النادي و100 خرونيكور محسوبين من برّة من برّة على النادي ومن داخل كلّ واحد شيطانو في جيبو … ليطرح عليهم سؤالا في غاية البساطة من نوع _شكونو المدرّب اللي تشوفوه حاليا صالح لهذه المرحلة في النادي ؟؟…

ما نطولش عليكم ..ماشي يجيه على الاقلّ 200 اقتراح حول اسماء مختلفة ..هو في الاخير ماشي يقرر اسم واحد ..النتيجة 10 من الحاضرين فرحين مبتهجين ويوليو هوما اللي وراء تعيين المدرّب اي ابطال و290 يصبحوا نبّارة … نعم هذه هي الصورة الكاريكاتورية لعلاقة النادي بجمهور الفيسبوك ..يرضاو 10 و290 نبّارة نبّارة نبّارة ….

وانا موقفي دائما ثابت ولا يتغيّر ..اللي يمشي بكلام الفيسبوك ومهاتراتو ما يستحقش يكون رئيس لايّ نادي وطززززززز في حرية التعبير والحرية والديموقراطية …السفينة يقودها قائد واحد ..لفترة معيّنة وبعد يجي الحساب … ربما البعض يقللي واذا نشوفو في السفينة قاعدة تغرق نسكتو ؟؟ اجابتي سيّبو السفينة وربان السفينة يخدم خدمتو واذا تحبوها ما تغرقش ساهموا بحديث العقل وبالفلوس زادة …راهو اخطر سبب يساهم في غرق السفينة هو الهاجوج والماجوج متاع فئات معينة في الفيسبوك