المخرج المنصف ذويب : هذه حكايتي مع مدير التلفزة

لسعد تعليمات مدير التلفزة التونسية عندي معاه حكايةهو الي صنصر برج الرومي بتعليمات.

اي سيدي عمناول قدمت مسلسل تحت عنوان برج الرومي عن كتاب عز الدين الحزقي نظارات أمي ولقي السيناريو استحسان لجنة القراءة والفرز واللجنة التنفيدية واللجنة المالية وقبلني سي الشاهد باش يقلي الي التلفزة تغيرت والي صارت ثورة في البلاد والدليل ان رمضان السنا وقع الاختيار على برج الرومي رغم الي هو يحكي على تجربة اليسار في السجون في السبعينات…

الحاصل شوية لا اقتنعت وبدينا في الانتاج اول ما خرج الخبر في الصحافة اتقلب على السيد المدير وقالي: كثرت علي التلفونات موش ممكن المرفق العمومي يحكي على نضالات اليسار ويتجاهل النضالات الاخري…

حقك كتبت على الاسلاميين حتى هوم تعذبوا في السجون وعندي تعليمات باش نتريث اما انا ماش نقدم على انتاج المسلسل رغم الضغوطات ومرة اخرى شوية لا صدقتو من وقتها بدات عملية المماطلة وإعادة صياغة العقد عدة مرات وبدات الادارة تمارس في الهواية متاعها المفضلة اتدخلك من باب تخرجك من خوخة حتي تعدى الوقت وماعادتش حتي امكانية لانجاز العمل في ظروف طيبة وقتها اختفى السيد المدير وماعادش يحب يقبلني ولا يهز التلفون والادارة جبدت الفيشة

وخلاني في التسلل مع الفريق بعد اربعة اسابيع من التحضير والتمارين مع الممثلين.هكذا توقف برج الرومي.وقتلي سألو الصحافي محسن عبد الرحمان: علاش صنصرت التلفزة برج الرومي قال ما هياش صنصرة أما تم تأجيل المسلسل للموسم القادم. وطبعا لا موسم قادم ولا يحزنون.

المنصف ذويب