المنستير : الأهالي يشتكون الإختناق المروري الدائم

المنستير ما تستحقش تعيش كل يوم في شلل مروري كامل وما تستحقش تكون مدينة بلا إشارات ضوئية تنظم المرورى بلا محولات تربط بين أحيائها وبلا مسالك بديلة تفك الإزدحام.
الوضع ولى لا يُطاق وزاد يتأزّم مع توسّع العمران وزيادة عدد السيارات وكثافة النشاط اليومي.
المنستير اليوم موش مجرد مدينة هي قطب جامعي صحي سياحي وإداري تستقبل آلاف الناس كل يوم: طلبة مرضى زوار موظفين… لكن الطرقات ما عادتش قادرة تستوعب الضغط هذا وكل تحرّك بسيط ولى مغامرة في الزحمة.
المفارقة الكبيرة إننا نعيش هذا الكل في مدينة ما فيهاش حتى إشارة ضوئية وحدة تنظم الحركة .
حي العمران ولى شبه معزول وقت الذروة والطريق للقاعة المغطاة يتحوّل لطريق مسدود حي رمادة و طريق قيروان كيف كيف .
اليوم ما عادش نستنّاو وعود نحب نسمعو مشاريع نحب نلمسو تحرّك نحب نشوفو مسؤولين يحبو المنستير قد ما أهلها يحبوها. المنستير اليوم تستحق تتنفس تستحق ترتاح تستحق تتقدّم وإلّا باش تواصل تغرق كل يوم في الزحمة .

منقول من بوابة المنستير