النائبة فاطمة المسدّي …كرهت المتاجرة بحقوق العمال

أنا فاطمة المسدي، ومانجاملش حد.😇
كرهت الشعبوية وقتلي تولّي تجارة رخيصة على حساب الناس.
كرهت المتاجرة بحقوق العمال من ناس ما خدمتش نهار في معمل، وما خذاتش موقف حقيقي وقت كان الصوت مكلف.
كرهت التعميم اللي يرمي كل مسؤول في نفس الكيس، كأنو الكلهم فاسدين،
بينما الفاسد الحقيقي يختفي في الضباب ويصفّق وممكن يترقى.
كرهت الاتهامات اللي تتقال بلا ملف، بلا وثيقة، بلا مسؤولية.
كرهت الناس اللي تشرّع للتهريب وتلبّس فيه رداء الاسترزاق،
كرهت الخطابات الجاهزة اللي تزايد على الدولة، وفي نفس الوقت تعيش على فشلها.
كرهت اللي عامل روحو عندو الباتيندة متاع مشروع وطني ما شوفنا منو حتى ملامح،
ولا متاع إسلام وهو أبعد ما يكون عن أخلاقيات الإسلام.
كرهت من يدّعي النضال وهو ما يعرفش حتى معنى الصبر في المعركة.
أنا نحب نخدم السياسة من الميدان، بالملفات، بالتجربة،
مانبنيش مواقفي على التصفيق،
ولا نبيع الوهم للناس باش نربح ساعة شعبية.
الإصلاح ما يتقالش عليه إنجاز بالكلام،
الإصلاح يتقيم.
يتقيم بالقوانين اللي تتنفّذ،
بالنتائج اللي تتحس،
بالمؤسسات اللي تتعدّل،
وبالناس اللي تعيش أحسن.
واذا غلطنا نصلحوا و منغالطوش الناس..
أنا ما نكرهش السياسة، نكره تشويهها.
ما نكرهش الشعب، نكره اللي يركب عليه.
نكره اللي يزايد عليه وهو أول من خذلو.
اليوم يلزمنا نرجعوا الاعتبار للناس اللي تخدم بصمت، للكفاءات..
للناس اللي خبرتها ما تجيش في خطبة،
للناس اللي تعرف قيمة الإصلاح قبل ما تكتب عليه تدوينة.
السياسة عندي شرف.
والحقيقة ما تتخباش.
وما يبقى كان العمل الحقيقي والنية النظيفة..