![انا والحب الحقيقي … عبد الكريم قطاطة](https://journalistesfaxien.tn/wp-content/uploads/2024/03/ktata_abdelkarim.jpg)
انا والحب الحقيقي … عبد الكريم قطاطة
لست ادري كيف اصف لكم تركيبتي في علاقاتي مع من احبّ … مذ خلقت وانا نهبط بقلاقلي على كل من احب سواء كان ذلك مع عائلتي او اصدقائي او زملائي … اعطي دون حساب ودون انتظار مقابل ..وكلما اكبر يكبر فيّ هذا السلوك بل ويتكاثر ..ودائما ممتلئ بنفس المبدأ حبّ الاخر لا يخضع لمنطق _ علاش وكيفاش ووقتاش _ والا اصبح حسابات وتخديم مخّ …حتما هذا الحب وهذا العشق الكامن فيّ ليل نهار تختلف درجاته من شخص لاخر ..لكن انا من الطائفة التي تغرق في الحب دون وجل او خوف … انا نغرق وحتى اذا ما طفيتش موش مشكل .. حتى اذا ما تنفستش تحت الماء موش مشكل .. واليوم وصغيرتي كرامة التي تجاوزت الاربعين وهي تحتفل بعيد ميلادها كان ميلادها اوّل غرق جميل في حبّي للاطفال .. هي كانت وستبقى طفلتي الجميلة ..كل سنة وانت طفلتي يا كرامة … لا وتقولوشي شعفت من الغرق ..وهو واحد كيفي ينجم يشعف من الغرق ..تي راني مهبول متاع بحر .. غرقت بعد كرامة في بحار لذيذة ..غرقت مع كروان ثم مع يوسف ثم مع ليليان واخيرا مع ياسين … وحتى في علاقتي مع محيطي لم اتوقف عن عطش الغرق ..كبرت ايه .. اما مازلت انا ايضا طفلا في حبي المجنون للغرق .. اسالكم ما قيمة حياتنا دون ذلك الغرق الجميل ..؟؟.. هي كطعام دون ملح وتوابل والحمد لله على نعمة الاحساس التي لم تمت فينا حتى نعيش دوما الغرق الجميل …براس اللي يعزّ عليكم .. براس صغاركم .. انتوما معايا في الفكرة او لا ؟؟ … مرة اخرى وهنا اتوجه الى طفلتي كرامة اليوم وهي تحتفل بعيد ميلادها سيقولون عن ابيك _شنوة هالاب المهبول اللي عندك ؟ يخخي موش يلزم يعمل عقل في هالعمر هذا ؟؟ حدسي يقول انك ستجيبين بما يلي .. انا فخورة بأبي وهو المجنون العاقل والعاقل المجنون … زعمة هي والا ماهياش ؟؟؟ … …