تونس لن تتخلّص من وحلها الا بيد من حديد….عبد الكريم قطاطة

اليوم وانا اتصفح الفيسبوك فُوجئت بل فُجعت بخبر تمنيت ان لا اعيش حتى اقرأه .. تصوّروا مجموعة من التلاميذ تلاميذ في الاعدادي راهو في جهة من جهات تونس يتظاهرون وذلك بعد قرار رياضي يقضي باقصاء حكم في كرة القدم ينتمي لتلك الجهة من القائمة الدوليّة … اي نعم .. اقسم بالله الحالة في تونس تبكّي .. سمّوني ما شئتم ..يلعن ابو الثورات والحرية والديموقراطية اللي توصّلنا لهذه الحالة .. معناها ما نستغربوش غدوة تخرج مظاهرة تطالب بتحطيم سور مدينة او معلم تاريخي لانو ما يتماشاش مع طبيعة وروح العصر ومع اغنية فضل شاكر الا وانا معاك … او مجموعة اخرى تقلك يلزمنا نصوموا الاثنين والخميس واللي نشدّوه فاطر نطرّدوه من المدرسة طرد نهائي ….زيدوا اقنعونا بانّ 14 جانفي ثورة على الظلم وفجر جديد للحرية والديموقراطية ..نعم كان هنالك قبل 14 جانفي مظالم ومظلومون ..لكن ما بعد 14 جانفي اصبحت تونس مرتعا للفوضى والعبث وتكاثر عدد الظالمين والمظلومين . وبجاه ربي ما تقوليش انو الثورات تتطلب سنوات لتهدأ العاصفة وتعطيوني مثال على ذلك الثورة الفرنسية …راهو الفارق كبير جدا بين 1789 و2011 .. تي جماعة الثورة الفرنسية لو عاشوا هذا الزمان راهو روبيسبيار ودانتون يستحيل يكونوا اخترعوا المقصلة .. وراهو حتى المفكرين متاع الثورة الفرنسية كجان جاك روسو وفولتار وغيرهما لو عاشوا في هذا الزمن لندّدوا و استنكروا ما وقع في تونس بعد 14 جانفي … .تونس لن تتخلّص من وحلها الا بيد من حديد دون شفقة او رحمة ولكن بعدالة ..دون ذلك غدُنا سيستفحل فيه البلد بالدمار والمدمّرين ..ومرة اخرى يلعن ابو الحرية بمفهومها الجديد وامّها وجدّتها وجدّها والتاسيلة متاعها منين دبّت لين هبّت ..