خرافات عمّي الباشير الرمضانيّة : خرافة الانية التي تولد والسفينة الي تحمل المازوط

يا سادة يا مادة يدلني ويدلكم للشهادة واليوم خرافة جديدة وتنبرة كان فهموها :

يحكيو في سالف العصر والزمان ان جحا تسلف انية طبخ من عند جارو وكانت نيتو مقمعزة بعد مدة رجعهالو ومعاها انية صغيرة وهو يعرف جارو طماع قالو مبروك انيتك ولدت وحلال عليك المولود فرح الجار وخباهم الزوز سي جحا رجعلو بعد مدة وطلب انية ما اكبر ومن النحاس سي الجار تحركتلو زرسة الطمع عطاهالو وقعد يستنى هاو تو يجي هاو تو يجي ولا ثمة جحا ولا حسوا

مشالوا لدارو لقاه يبكي ويغرّد مشى في بالو شكون ماتلو قالو لاباس ماهو يا جحا قالو البركة فيك الانية النحاس متاعك ماتت عالولادة قلو كيفاش ؟ ثمة انية تموت ؟ قالو يا جاري اذا كان ولدت علاش ما تموتش ؟

وحديثنا قياس ونرجعوا بعلمنا وخبرنا للسفينة ايكسلو …خردة وما غير اوراق وامورها مفرعسة وتونس طامعة في 750 طنا من القازوال طلعلهم ما بحر

اي بر شاهية طيبة

حافظ