خوذو متاعكم الطيب المهيري وعطيونا متاعنا حمادي العقربي….مَحمّد التركي

سكان تونس الكبرى ما هوماش هاضمين ولا قابلين هوما واللي يقدمو نشرات الرياضة في التلافز والإذاعات وغيرهم من كبارات التوانسة وانا نعني بالتوانسة العباد اللي يسكنو في العاصمة باش يتسمى ملعب رادس بسم حمادي العقربي .
احنا في صفاقس ملعبنا الوحيد المتواضع سميناه باسم الطيب المهيري من وقت اللي توفى الله يرحمو في الستينات وكان وقتها كاتب الدولة للداخلية في عهد بورقيبة ومن هاك الوقت الصفاقسية عمرهم ما غلطو ما يسميو ستادهم كان باسم الطيب المهيري اللي هو ولد تونس العاصمة ماهواش صفاقسي .
نجيو توة لستاد رادس اللي عطاووه تو عندهم مدة ماهياش طويلة اسم الملاعبي حمادي العقربي وشكون ما يعرفشي هذا الملاعبي الي تونس ما ولدتش كيفو لعب وأخلاق .
جماعة تونس ما يساعدهمش كي ما قلنا ستادهم في رادس يتسمى باسم حمادى وقعدو يتجاهلوه وما يقولو كان ملعب رادس وكفى بالله حسيبا .
آش خسرنا انا واللهي نفرح برشة لوكان ملعب الطيب المهيري يولي ملعب حمادي العقربي خاطر حمادي لعب فيه برشا اكثر من اي ملعب آخر وتفنن فيه كي ما حب وشتهى وتأبن فيه كي توفى وخرج منو لقبرو .
ونعطيو ستاد رادس لروح المرحوم الطيب المهيري وعملية التبادل ساهلة ما تكلفش حتى مصروف كان امر وزاري ولا رئاسي في أقصى الحالات ووقتها الي يتناساو حمادي العقربي في النشرات الاخبارية ولا الرياضية يرتاحو من عذاب القهرة .

مَحمد التركي