زعمة ….يجي هاكا النهار ..؟؟ الفة يوسف

نتمنى نهار نشوف شكون في البلاد هذي يعمل نقده الذاتي، ربما نهضوي يعترف أنه 2011 كانت فرصة ضيعها منطق الغنيمة والقلوب المعبية، أو تجمعي يعترف أنه رغم الرخاء الاقتصادي موش معقول شخص يقعد في الحكم 23 سنة، أو بقايا التكتل والجمهوري واليسار بأنواعه يعترفو أنهم غلطوا، البعض بالانتهازية متاعهم والبعض بمنطق خلي نرتاحو من هاذم وموش مهم اشكون يجي…نتمنى نسمع شكون يساند المنظومة هذي من غير ما يوهمنا اللي أحنا عايشين في جنة على الأرض، وميمونة تعرف ربي، وربي يعرف ميمونة…نتمنى نسمع شكون يقول موش اللي في الحبس الكل مجرمة، وموش اللي لبره الكل أبرياء، نتمنى حد يقول اللي الشيء اللي شفناه في برلمان 2011 -2021 كان أحياناً تهريج وعنف، ونتمنى نواب اليوم زادة يعترفو أنه اللي قاعدين نشوفو فيه مهوش مطمح التوانسة…نتمنى نشوف ناس تحكي على اللي أنجزته، وعلى اللي ما نجمتش تعمله، والكمال لله…ما فيها باس نقولو تقول رانا غلطنا، هاك حدنا، أسأنا الفهم في وقت معين الخ…
النقد الذاتي ما يعرفوه كان قلة، شخصيا في ها ال15 سنة قلت بارش كلام كيف يخرجهو لي الفايسبوك اليوم نضحك عليه وعلى روحي…ونتصور بارش منا في ها الوضع، الإنسان يتبدل يتطور يتغير…أما منطق أنا ديما على حق والأخرين على باطل، منطق أحنا ملايكة والأخرين شواطن ما يوصل كان للهاوية…
ميسالش خليو للصلح مكان…بالنهاية كلنا توانسة مهما اختلفنا وفرقتنا الايديولوجيات وخصوصا الحسابات…
وربي يهدي…