صفاقس: مغازة تستغفل المواطن لكسب المال دون حقّ

يبدو أن التحيل في بعض المغازات الكبرى بصفاقس صار ضرورة تجارية لكسب المال بسرعة .

ففي إحدى المغازات الكبرى المعروفة بصفاقس يجد الحريف نفسه ضحية للتحيل حيث يعمد أصحاب هذه المغازات لاتباعها للربح السريع دون التفكير في سمعة المغازة ولا في خسارة الحريف.

وتكون عملية التحيل كما ورد على لسان أحد الضحايا:

مؤخّرا، مغازة مشهورة طلعت بطلعة مسمومة وخبيثة:

أنّك كيف تقضي قضية معيّنة، عندك الحقّ في ticket فيها قيمة 10% من مبلغ المشتريات (مثلا تقضي ب20د تاخذ تيكي فيها ألفين.. تقضي ب40د تاخذ 4د.. تقضي ب80د تاخذ 8د.. وهكذا دواليك)..ويقولولك ticket هذيك عندك الحق تشري بيها أدوات مدرسيّة فقط موش قضية أخرى (التّكعبيرة الأولى)..أكيد تلقى برشة حرفاء ما فيبالهمش بالطّلعة هاذي، والcaissier ما يقلّكش راهو عندك الحقّ في ticket فيها 10% تشري بيهم أدوات مدرسيّة.. لكن يطفّي الضّوء، لأنّك أنت وحدك يلزمك اطّالب بيها التّيكي المحنونة هاذي (التّكعبيرة الثّانية)..يولّي الحريف إلّي عندو صغار تقرى، يقضي قد ما ينجّم من المغازة باش المبلغ في ticket يكون أكبر..وقد يستعين الحريف حتّى بعائلته وأقاربه وأصدقائه باش يجمّل أكثر تيكيات ومنه أكثر مبالغ مخصّصة للأدوات المدرسيّة..لكن لهنا التّكعبيرة الكبيرة:كيف تلمّد أكثر ما يمكن من التّيكيات وتمشي باش تشري بيهم أدوات مدرسيّة، يقولوك ما عندكش الحقّ تشري بالتّيكيات إلّي عندك الكلّ مع بعضهم.. ويلزمك تشري بفلوسك بقيمة 10 دينارات أدوات باش يطرحولك منها قيمة تيكي واحدة فقط..مثلا عندك تيكي فيها 3د يلزمك تشري ب10د وفي الكاسة ينقّصولك منها حقّ التيكي.. يعني تلقى روحك دافع 7دينارات !!!يعني يلزمك تكحّ باش تنجّم تستنفع بالتّيكي المحنونة.. كيف تقلهم هاو برشة تيكيات بقاو فاضلين عندي.. يقولولك موش مشكلتنا وهاذي تعليمات من فوق !! والغريب أنّو الكلام هذا ما يقولوهوش ماللّول وهذا متعمّد الهدف منه التحيّل واِستغباء المواطن.. يعني يلزمك تحصل كالضًبع وتلقى روحك قدّام الأمر الواقع باش فلخر تكتشف أنّو تكعبرلك من الكاط فاص !!!صراحة هذا لا علاقة له بفنّ التّسويق وتكتيكيّات marketing..لأنّه لا يُعدّ إلّا أن يكون تحيّلا ممنهجا بسابق الإصرار والترصّد..طبعا هذا ليس بغريب عن هؤلاء الحثالة الممتصّين لدم المواطن..لذلك فلتأخذوا حذركم أيًها الأخوة والأخوات

هاجر بن عمر