علاش الدولة باللي تمص في دم المواطن.. ديمة فالسة؟؟

من الأمور المتفق عليها في تونس ومن أصل الدنيا .. أنه دولتنا الموقرة تدخّل في أموال ضخمة لخزينتها العامة من جرة الضرائب والأداءات الديوانية والداخلية والخاريجية ..
يا ولدي كي تجي تحسب تلقى تونس تربح أكثر من أمالي المول .. وتربح أكثر من أصحاب الشركات والمصانع .. والمواطن في مخها وبرامجها وسياستها المالية تقولشي سيخ متاع شاورما النهار وما جاب النهار وهي تنجّر فيه .. والمشكلة اللي هي ديمة فالسة وتسف في التراب .. وهي بيدها موش فاهمة علاش .. والسبب بسيط للاّ .. على خاطر الفلوس اللي تاخو فيها من عند المواطن .. فلوس حرام .. واخذتهم بالظلم وبالباطل .. وببرشة دعاء شر .. والحرام يا ولدي عمره ما يثمر .. وزيد فوق هذا الكل الدولة مقصرة في واجباتها .. في الصحة والتعليم والبنية التحتية المزمرة والكياسات المكسرة .. والإدارات اللي مازالت تخدم بعقلية مشٌي حويجة .. وناقصة ورقة .. وأرجع غدوة .. والمواطن التونسي بصفة عامة عمره ما حس أن بلاده تستحق في الفلوس اللي تاخذ فيهم من عرقه وقوت صغاره بالسيف وبالقوة …
فلذلك عادي جدا أن دولة اللي تتعامل مع شعبها هكة .. تكون عقوبتها أنها “ديمة فالسة”
إلياس الڨرڨوري