كلّ يوم يزداد يقيني .. عبد الكريم قطاطة

اتابع كالعديد ما يُنشر على الفيسبوك وخاصة في ما يتعلّق من اخبار تهمّ بلدي واحداث بلدي …وكل يوم يزداد يقيني بانّ الاوضاع لن تسير نحو الافضل مادام العديد منّا ينطلق في مواقفه وتعاليقه من خانة _ قاتلك قاتلك _ وللاسف الشديد انّ ما يُسمّى بالنخبة هم مشاعل هذه المنظومة المتخلّفة والبائسة و الهدّامة .

راهو وقت ما نحبكش موش معناها ايّ حاجة تعملها خايبة .. ووقت نحبّك موش معناها كلّ حاجة تعملها هي باهية .. وفي تقديري المتواضع كلّ من يتعامل بمنظومة قاتلك قاتلك هو فاقد للحدّ الادنى من الوعي ومن الوطنيّة ايضا .. تحبّ او ما تحبش هاكة حقّ من حقوقك اما تستنّى في غريمك في الدورة باش حتى وقت يقلك حتّى صباح الخير تاوّلها بالعقد متاعك وتوشوش لصحابك ردّوا بالكم راهي صباح الخير متاعو كذب وترهدين و مؤامرة ..

موش هذا هو التُّخُلّف يمشي على ساقيه .؟؟… اتّقوا الله في بلادنا وقولوا الحقّ ولو على انفسكم …. البلاد شاعلة راهي ..ماتزيدوش تشعلوها بالخمج الفكري متاعكم ..المركب التونسي يسير في بحر متلاطم الامواج ..ووقت يغرق بكلّنا نغرقو .. بكلّنا .. بكلّنا .. بكلّنا ..انّ الله لا يظلم الناس شيئا ولكنّ الناس انفسهم يظلمون … نحبّك يا تونس ونحبّ اللي يحبّك بعمق ووعي وبعيدا عن كلّ الاجندات بيمينها ويسارها . وبعنترياتها وغبائها …