مقداد السهيلي : برقيّة عاجلة إلى الأستاذة ألفة يوسف

أستاذة ألفة يوسف … العقل الإبداعي في بلادنا ليس مشلولا بالمرّة … المبدع يتعب ويمرض باش يكتب باش يلحّن باش يعمل رواية باش يعمل غناية … باش يكتب مسلسل … اللي هو مجهود كبير وماهوش في متناول الجميع … على خاطر كلمة مبدع كبيرة ودرجة مرموقة … سي المبدع بعد ما يحضّر إنتاجو … ويبدا باش يدخل مرحلة التنفيذ … يدخل في دوّامة تدوّخ … ويتصدم بالواقع المرير .. اللي هو واقع البلّوشي … أو ماكلة القسطل بيد القطّوسة … لأنو من غير المنطقي وغير المقبول بالمرّة ناس تصوّر في الذهب توصل للمبدع تولّي تبكي وتشكي … وماعندهاش فلوس … هوما يسكنوا في الفيلات بالبيسينات .. ومشلقحين في كراهب 9X9 … واولادهم يقراو في الخارج … ويفطروا بالكافيار وخوك المبدع هازز 9 كيلو اوراق يستنّى في الرواق … تعرفوا لبرّة قداش يخلص الملحن ؟ قداش يخلص الشاعر الغنائي ؟ قداش يخلص الموزع الموسيقي ؟ قداش يخلص مهندس الصوت ؟ قداش يخلص السيناريست؟

موش العقل الابداعي متاعنا مشلول … البنية بكلها ترعش … والتمكميك عشّش في العرص متاع البنية بكلها … الشيء اللي فتح المجال لتواجد أشباه مبدعين قابلين كل العروض … في كل الوضعيات … ممّا ولّد سلعة مضروبة … هذاكه علاش المستوى العام طاح وولّى مايشبّه لشيء … نعذركم على خاطر ماتعرفوش والا ماعندكمش جاش باش تعرفوا … أما فمّة ناس تعرف الحقيقة ومذبوحة … ومنهم عبدكم الضعيف … أنا مستعد نخرجلكم قائمة عالفايسبوك العظيم فيها أسماء مبدعين ومبدعات عندهم باع وذراع ومعاهم قائمة في أعمال فنّيّة عندها قيمة كبيرة أما أصحابها تعبوا عليها ويرفضوا باش يتبرّعوا بيها وإلا يبيعوها بسوم وذن البقرة … وتوّة ولاّت لغة جديدة … ياخذوا الخدمة متاع المبدع بسوم محترم جدّا ويعملوا معاه كنتراتو … وفي موعد الخلاص يلقى المبدع روحو يهرول في كلوارات المحاكم … ويلوّن في وجهو … ويفرح كيف القاضي مايناديلوش باسمو باش مايتفضحش ويولّي مسلسل تركي …
أختي ألفة … حكاية الابداع والمبدعين كان تتعمل فيلم إلا ماتهز الجوائز الكل
ومعاهم كاس افريقيا وآسيا وكوريا الشمالية … ربي يهديك نطّقتني من جنابي وانا عندي بلية في لساني مالقيتلهاش دواء … آش من إبداع مع مهرجان قلوب الدلّاع !!!