منظومة تربوية فاشلة وجب إصلاحها في القريب العاجل

تعتبر المنظومة التربوية في تونس من أسوأ المنظومات على الإطلاق والتي تثقل كاهل الولي والتلميذ وتجعل المربي مثل الآلة التي تعيد نفسها رغم التطور التكنولوجي والعلمي الذي تشهده عديد الدول العربية والغربية مما يجعلنا في مؤخرة الترتيب مقارنة ببقية الدول.

ومن أهم ماورد في صفحات التواصل الاجتماعي حول فشل المنظومة التربوية والدعوة إلى إصلاحها في أسرع الآجال المنشور التالي:

تخيلوا معايا:

طفل يفيق من النوم الساعة 7 متاع الصباح .. باش يمشي يقرا في المدرسة والا الكولاج ويقعد 8 ساعات في القسم تقريبا بين صباح وعشية .. ويرجع للدار يرتاح سويعة ياكل فيها .. ويقعد بين ساعة وساعتين يحضر في الواجبات المنزلية قراية غدوة والا دوفوار والا…. وهوب تلقاها 9 متاع الليل .. يدخل يرقد باش غدوة يقوم الصباح باش يعاود ويكرر نفس اللى عمله البارح.. تيجي نهاية الأسبوع المفروض في انتظار الويكاند نهارين السبت العشية والاحد.. يكون عنده يا امتحانات فروض مراقبة والا شفاهي .. ودروس الدعم الايتيد .. والا بحوث والا عمل منزلي…هذا نظام تعليمي وتربوي سليم ؟ هذا نظام دكتاتوري ..فاشي …فاشل… وينو الوقت اللى يعيشو الطفل للعب ؟.. ويني طفولته ؟ وينو الفرح والسعادة ؟ ويني النفسية ؟ وين خلق روح الإبداع والثقافة والوعي ؟ ويني التربية السليمة ؟ أو الوقت اللي يمارس فيه رياضة مفيدة ؟ وينو الوقت اللى يمارس فيه موهبة يحبها ؟للأسف نظام يحول الأطفال لماكنيات علي أمل صناعة مستقبل مبهر لهم .. مع أنه نظام غير سوي ومش متوازن .. يخلق أشخاصا غير أسوياء للمجتمع، معاهم شهادات ممكن تكون كبيرة .. لكن للأسف شخصيات مهلهلة معقدة لم تمارس طفولتها كما ينبغي.