نقابة قوات الأمن الداخلي تستغرب نمط تفكير رئيس الحكومة

الى السيد رئيس الحكومة
بدون مقدمات و بعد السلام و كل عبارات التقدير نحب نتوجهلك ببعض الاسطر الي لعلة تعدلك نمط تفكيرك و نظرتك تجاه المحاربين من منتسبي المؤسسة الامنية من اجل هذا الوطن العزيز ..
يعني رجال المؤسسة الامنية في الاوقات الحرجة خدمو تونس منغير حسابات و بدون اي حماية طبية و الدولة ضحات بينا و احنا قبلنا التضحية و التحدي و هذا كلو من اجل المصلحة العامة ورغم هذا ما هربناش من ارض المعركة ضد هذا الوباء الفتاك ..
خلينا عايلاتنا و صغارنا
تعذبنا و تمرمدنا في التنقل لاماكن عملنا
خدمنا منغير تململ
و موش بش نبقى نعددلك في حجم تضحياتنا خاطر واجب
اما الي يحز في نفسنا و يبهتني كرجل امن
تستثني الرجال هاذي الكل و تستدعى مدونين ؟؟؟
فرارات ؟؟
مؤثرين ؟؟
يعني هاذومة تعتبرهم نافذين و مؤثرين في السوشيل ميديا و الرجال الي مضحية كل يوم مايتلفلهم حد ؟؟
هذا جزائنا و الا هذا هو حجمنا في نظر المسؤولين !!
نكرمو ناس تكتب في جملتين و تهبط في تصويرتين في الانستغرام و نستثنيو الرجال الي مضحية بحياتها ؟؟
يعني بعد الحرب ضد هالمرض هذا نتنساو و كأننا لم نكن و نكرمو فرارات ؟؟؟؟
لو نتجرد من ملابس الامني و نحلل شوية بتفكيري البسيط هذا و بعد تعهدكم بتغطية الاستشهار للمؤسسات الاعلامية الي المزمر فيهم يخلص في 15 مليون و توة تكرمو مدونين يمشي في مخي وبدون مقدمات الي انتومة تحبو تهيمنو عالمشهد الاعلامي و هدفكم حصد اكبر عدد من الموالين بش تبعدو قدر الامكان على اقلام النقد غير هذا صعيب تقنعني بحاجة اخرى..
بخلاف الامن فمة الجيش و الصحة و الشباب المبدع و المخترع و فمة شباب في الجمعيات تطوعو لخدمة تونس و نساء في معمل في القيروان قعدو اكثر من شهر في حجر داخل المعمل بش العجلة متع الانتاج ماتاقفش
كل التضحيات هاذي تتنسى و تعيطو للفرارات ؟؟
بصراحة هاذي ماتوقعناهاش اما في كل الحلات تبقاو انتومة اسياد القرار و نحترمو رأيكم و اختياراتكم انما ننقدوكم و هذا نقد بناء لعل نجمو نلفتو نظركم لتضحيات المؤسسة الامنية الي اصبحت معادش تتشاف بما انكم ما اعتبرتوناش مؤثرين الى حد ما ..
بارك الله فيكم و نحن فهمناكم اي نعم فهمناكم ……
صفحة نقابة قوات الامن الداخلي ❤🇹🇳🔥