25 جويلية .. للجميع .. رغم أنف الجميع .. عبد الكريم قطاطة

يوم 25 جويلية في تاريخ تونس يوم ليس كالايام الاخرى .. بداية هو يوم اعلان الجمهورية سنة 57 ..وبالطبيعة اعداء بورقيبة يرفضوا الاعتراف بيه .. يوم 25 جويلية 2013 هو يوم اغتيال الحاج البراهمي …زعمة شكون وراء اغتيالو ؟ زعمة يجي 25 جويلية 2050 ونعرفو الحقيقة ؟؟ الله يرحمك يا حاج …25 جويلية 2019 وفاة الباجي قايد السبسي .. العديد منّا استنيناه من قدام جانا من تالي حتى هو ..الله يغفرلو ويرحمو … 25 جويلية 2021 .. قيس سعيّد يقرّر تجميد البرلمان واقالة حكومة المشيشي ..وطبعا البعض يعتبرو يوم الخلاص من قوم العشر سنوات السوداء لتونس وفي الضفة الاخرى مجموعة اخرى كونت جبهة الخلاص للخلاص من قيس سعيّد … الاكيد انّ 25 جويلية يوم غير عادي ..والاكيد ايضا انّ الشعب التونسي في جلّه ينتظر 25 جويلية اخر يسود فيه الامن والامان والعيش الكريم لكلّ ابنائه ..وهذا لن يكون الا بفضل ابنائه الوطنيين المخلصين وسحقا للخونة والمتآمرين على تونس من الداخل والخارج