3 جانفي 2026: زوز فرق… وزوز معاني للوطنية….. أشرف المذيوب

نهار 3 جانفي 2026، تونس شافت زوز فرق تحب ترفع علم بلادها لفوق…
لكن الفرق ما كانش في النتيجة وحدها لكن كان في المعنى زادا.
الفريق الأوّل:
رجال الأمن والجيش.
بلا جمهور، بلا أضواء، بلا بلاتوهات.
خدموا في صمت، بقلوب عامرة بالإيمان بالوطن، وتصدّوا لعملية إرهابية كانت تنجّم تكون كارثة في القصرين.
واجهوا الموت، وقدّموا زميلهم شهيد، ورفعوا علم تونس بدمهم وبشجاعتهم.
هاذم ما لعبوش ماتش…
هاذم لعبوا على مصير بلاد.
الفريق الثاني:
نسور قرطاج: لاعبين، مدرّبين، أطباء، أخصائيين، وجمهور جا من بعيد يشجّع.
إمكانيات، تحضيرات، وأضواء.
ورغم هذا، خسارة قدّام مالي، حتى والخصم منقوص بورقة حمراء.
وهنا السؤال يفرض روحو:
شنوّة هي الوطنية؟
الوطنية موش في التصفيق،
موش في الكاميرات،
موش في العقود والامتيازات.
الوطنية في القلب اللي يقدِّم وما يخافش،
في الراجل اللي يعرف روحو يمكن ما يرجعش للدار،
في اللي يكمل للآخر نفس… مهما كان الثمن.
بالنسبة لشخصي،
أسود قرطاج الحقيقيين
هم رجال الأمن والجيش،
اللي يحرسوا البلاد وقت اللي الناس الكل ترقد،
واللي يستحقوا الدعم، الاحترام، والتقدير…
موش بالكلام،
بل بالاعتراف الحقيقي بتضحياتهم.
تحيّة للي رفعوا علم تونس بالدم،
موش بالنتائج. 🇹🇳