أعرف حقك : إستخلاص الشيك دون رصيد … سامي القلال

منير جزار الحومة الناس الكل تحبو وتدلل عليه، نهار جاه سمير وقلو عندي عرس بنتي وجاوني الضيفان ونحب على شوية زهومة أما ما عندي كان شيك باش نخلصك، وعليك آمان الله، تصبو يخلص، بحول الله، قلو الله يبارك، وعطاه اللحمات ومشى للبانكة صب الشيك باش يطمان على فليساتو.

بعد نهارين رجع للبانكة يتفقد في حسابو ياخي البنكاجي ناداه وقلو الشيك إلى صبيتو راهو رجع دون رصيد وأحنا باش نبداو في الإجراءات وكان سي سمير ما خلصش راهو ماشي يدخل للحبس وينجم يوصل الحكم عليه بثلاثة سنين وخطية بـ20 بالمائة من قيمة الشيك.

منير تفجع وعلى تعديتي من قدام حانوتو

 ناداني وقالي: يا وليدي جابك ربي، إيجا نقلك، سمعت هاكة سمير شعمل فيا… دلني يا وليدي على طريق الخير يدلك على الشهادة..

قلتلو: سي منير  ما تخافش حد ما يضيع حقو بقدرت ربي.

قالي: كيفاش ياوليدي! وإنت تعرف إلي المحاكم في الجزائي تطول وأنا الفلوس ندور بيهم وربي يعلم بالحال في هذا الظرف الصعيب؟؟؟

قلتلو: ما تخافش حقك تاخذوا وفي أسرع وقت إن شاء الله ومن غير ما نستناو القضية الجزائية.

قالي: كيفاش يا وليدي يفرحك ربي.

قلتلو: أول حاجة لا زمني نعرف قيمة الشيك فوق 150 دينار وإلا أقل؟

قالي: وشنوة الفرق الكلها فلوس والفرنك بحسابو في وقتنا توة !؟

قلتلو: لا يا سي منير، كان فوق 150 دينار لازم أول حاجة نعملوا تنبيه عن طريق عدل تنفيذ وكان أقل نجمو نتخلاو على هذا الإجراء.

قالي: لا فوق 150 دينار يا وليدي…

قلتلو: كهو مالا لازمنا نعملو تنبيه ونخليولو أجل للخلاص كان خلص فبيها وكان ما خلصش نعملو أمر بالدفع.

قالي: وشنوة هذا الأمر بالدفع ؟؟؟

قلتلو: هذا إجراء يتم قدام رئيس المحكمة في مكتبه ويكون إما قاضي الناحية إذا قيمة الشيك ما تتجاوزش 7000 دينار وإذا تتجاوز يصير قدام رئيس المحكمة الإبتدائية. وينظر فيه القاضي في الأمر بالدفع على ضوء الشيك ومن غير ما نستدعيو سي سمير وإذا وافق عليه القاضي نعلمو سي سمير بيه والباهي إلي فيه حتى الإستئناف ما يوقفش التنفيذ.

قالي: الحمد لله يا وليدي ربي يجيبنا في الصواب.

قلتلو: كان خاف وخلصك فبيها، وإلا لازم نعملولوا من بعدو عقلة على دبشو وإلا عقاراتو ونبيعوهم وهذا الكل كيما قتلك من غير ما نستناو لا الإستئناف ولا القضية الجزائية وتاخو حقك في أسرع وقت الكلها أيام معدودة وهكك ما يضيع حق حد عند حد.

قالي: الحمد لله يا وليدي طمنتني … خليني نشوف محامي يحركلي على حقي…

أعرف حقك… والحق يعلو ولا يعلى عليه