أعرف حقك … مع سامي القلال … الإشتراك في الملكية في إطار الصداق

أحمد ولد الحومة ناس الكل فرحانة بعرسو تستنى فيه عندها سنين، نهار تعديت نطمن على أمو تستحقشي حاجة نعاونها فيها في حوسة العرس بإعتباري ولد الدار وأحمد كيما خويا، نلقها مغششة ومقهورة.

قلتلها: ميمتي أحكيلي شنوة قلقك؟

قالتلي: آه يا وليدي… خطبية أحمد طلعت داخلة على الطمع، طامعة في ورثة بوه وزيد سمعت بيه ماشي يحل شركة جديدة بعد العرس ياخي أهي شادة فيه باش يعمللها إشتراك في الملكية في الصداق.

قلتلها: ميمتي ما تظلمش بنت الناس … راهو نظام الإشتراك في الملكية منظم بالقانون وموش مطلق والمشرع كبف نظمو خذا بعين الإعتبار هذي الحاجات ومن بينها الإرث إلى ما يدخلش في إطار الإشتراك في الملكية.

قالتلي: فهمني بالباهي يا وليدي جابك ربي وإن شاء الله ما نظلمو حد

قلتلها: ما تعتبر أملاكا مشتركة بين الزوجين، إلا العقارات المكتسبة بعد الزواج وإلا بعد إبرام عقد الاشتراك بإعتبارو ينجم يصير حتى بعد العرس مدام موش جاية من الإرث أو الهبة أو الوصية، وزيد لازم يكون العقار إلي شراوه بعد العرس مخصص لاستعمال العائلة أو لمصلحتها.

قالتلي: ياوليدي وحكاية الشركة

قلتلها: الشركة ما تدخلش في الإشتراك في الملكية بإعتبارها موش عقار وحتى العقارات المعدة لاستعمال مهني بحت ما تدخلش في الأملاك المشتركة زادة.

قالتلي: آهي طلعت الحكاية فارغة معناها موش ماشي تهز الملمة وإلي ثمة     

قلتلها: ميمتي هذا القانون صار باش يأمن المرأة وزيد المرأة اليوم تعاون في راجلها في المصروف بإعتبارها تخدم وحتى شدان الصغار خدمة وهذي أقل حاجة ينجم يردلها بيه الجميل متاعها موش طميعة.

وزدت وضحتلها وقلتلها إلي: هذا ما يمنعش جعل الاشتراك شاملا لجميع عقاراتهما، بما فيها تلك المكتسبة ملكيتها قبل الزواج وتلك المتأتية ملكيتها من هبة أو إرث أو وصية، ويجب التنصيص على ذلك صراحة في العقد.

قالتلي: الحمد لله يا وليدي طمنتني … أما هذا يتربط بيه على طول حياتو وليدي

قلتلها: الاشتراك في الملكية يوفى، إما بوفاة أحد الزوجين ربي يطول في عمارهم، أو بالطلاق، وإلا بتفريق أملاكهما قضائيا، أو عن طريق الاتفاق بيناتهم.

قالتلي: ربي يستر وليدي يدبرو روسهم وإلي يراوه صالح يعملوه الفايدة طمنت شوية… أعرف حقك… والحق يعلو ولا يعلى عليه