المؤلم إن التفاهة اصبحت تُستهلك بشراهة…اشرف المذيوب

في زمن صارت فيه التفاهة لغة العصر،
و الضجيج أقوى من الحكمة،
ولات القيمة تُقاس بعدد المشاهدات… موش بعمق الفكرة.
هذا “وحشي”، وهذا “خلايق دايرة”،
وكل يوم يطلع قناع جديد فوق مسرح كبير اسمو السوشيال ميديا،
مسرح يخليك تشوف ناس تمثل أكثر ما تعيش،
وتتكلم أكثر ما تفهم.
المؤلم موش إنو التفاهة موجودة…
المؤلم إنو ولات تُستهلك بشراهة،
حتى صار الإنسان يهرب من التفكير باش ما يحسش الوجيعة.
فما حكمة تقول:
“العقول العظيمة تناقش الأفكار، والعقول الفارغة تناقش الأشخاص.”
واليوم… الناس ولات تناقش المظاهر، الأصوات، واللقطات القصيرة،
أما المعنى؟ مات تحت الزحمة.
صرنا نعيشو عصر الإنسان الخفيف…
خفيف في كلامو، في علاقاتو، وحتى في مبادئو.
يبدّل قناعاتو كي يبدّل صورة البروفيل،
ويجري وراء القبول أكثر من الحقيقة.
لكن مهما يعلو الضجيج،
يبقى الإنسان الحقيقي نادر…
لأن العمق ما يتقاسش بكثرة الكلام،
والأشياء العظيمة ديما هادئة.